1 Mulungu wangu, Mulungu wangu, habali kunileka?

Habali kwa kutali kuno nokulamba unikombole?

Habali huhulika voniiyalala?

2 Weye Mndewa Mulungu, nolila imisi, mbali hunidika,

na ichilo iviya, mbali sipata muhavu.

3 Mbali weye kwela,

weye kotogozigwa na Waisilaili.

4 Wasaho zetu wakuhuwila,

wakuhuwila weye na kuwakombola.

5 Wakulamba weye na wakomboligwa,

wakuhuwila weye, nawo hawagwile chinyala.

6 Mbali niye mng'onyo siyo munhu,

nyehuligwa na kuzehigwa na wanhu.

7 Wose woniwona wonizeha,

wonifonza na kutingisa matwi yawo.

8 Wolonga, "Kamuhuwila Mndewa Mulungu,

lelo Mulungu nayamkombole!

One Mulungu kanogelwa nayo,

nayamkombole."

9 Kunilava muna iinda ya mami yangu,

kunikaliza vinikalile nokong'ha tombo da mami yangu.

10 Kwandusila vinyelekigwe, kunilola goya,

kwandusila vinyelekigwe, weye kuwa Mulungu wangu.

11 Sekeunileke, kwaviya uzidilwa wahabehi,

habule wa kunitaza.

12 Wehi wengi wanizinga fana ng'ombe lume,

Wonisondelela fana ng'ombe walume wakali wa Bashani!

13 Wogubula milomo yawo fana simba,

fana simba yovavatula na kubuma.

14 Nitika fana mazi,

mavuha yangu yose yasiguka,

moyo wangu ulinga fana uhula,

wolumbuka mgati yangu.

15 Mulomo wangu unyala fana zae,

lulimi lwangu lonamata muna umulomo wangu,

weye konitambalisa muna yamatimbwisi ya ifa.

16 Wehi wanizinga, fana bumbila da zimbwa,

watobola makono yangu na magulu yangu fana simba.

17 Nodaha kuyapeta mavuha yangu yose,

wehi wangu wonibunhulila meso na kuigoda.

18 Woigolela mawalo yangu,

na woditowela mhiya walo jangu.

19 Mbali weye Mndewa Mulungu sekeunileke,

weye uli chandusilo cha nguvu,

wize himahima unitaze.

20 Unilopole na upanga,

unikombole muna zinguvu za zimbwa wano.

21 Unilopole muna imilomo ya simba wano,

unikombole kulawa muna zinguvu za ng'ombe mbago wano.

22 Nizawalongela ndugu viya viwili,

nizakutogoza hana umting'hano.

23 Mweye womumdumba Mndewa Mulungu, mtogozeni!

Mweye welesi wose wa Isilaili, mumuhishimu yeye!

Mweye welesi wose wa Isilaili, mdumbeni yeye!

24 Kwaviya yeye hehula unyondenyonde wa munhu,

na haifisa kutali nayo,

mbali komtegeleza viyompula yamtaze.

25 Kwa ichimu chako nizakutogoza hana umting'hano wa wanhu,

nizafikiza vilaho vangu haulongozi wa waja wokudumba.

26 Ngayengaye wezakuja na kwiguta,

womzahila Mndewa Mulungu, wezamtogoza,

mweye mkale goya siku zose!

27 Wanhu wa zisi zose wezakumbuka na kumbwelela Mndewa Mulungu,

wanhu wa zisi zose wezamtambikila,

28 kwaviya Mndewa Mulungu ni mfalume na kozitawala zisi zose.

29 Matajili wose wa isi wezadeng'helela na kutambika,

wose wodanganika na wezamtumbalila mavindi,

wose hawadaha kwamhilila ugima wawo.

30 Nyelesi zikwiza zizamsang'hanila,

wanhu wezazipeta mbuli za Mndewa Mulungu.

31 Wezagong'onda sang'hano zake zigoloke,

wanhu weli hawanavumbuka wezalongeligwa,

"Mndewa Mulungu niiyo yatendile mbuli izo!"