1 Weye Mulungu, zisi zingila muna iisi yako youisagule.

Waitenda kaye yako yelile yambule mwiko,

wadileka bululu da Yelusalemu kuwa matongo.

2 Wailava mitufi ya wasang'hani wako,

kuwa ndiya ya ndege wa kuulanga,

na mitufi ya wanhu wako waminika,

iwe ndiya ya wanyama wa kumbago.

3 Damu yawo itika fana viya mazi,

kudizinga bululu jose da Yelusalemu,

na habule munhu yoyose wa kuwawanda.

4 Chiwa na chinyala kwa wanhu wa zisi zimwenga.

Wanhu wa zisi zilihabehi na cheye wachizeha na wachiseka.

5 Weye Mndewa Mulungu kwizakuwa na ludoko mbaka zuwaki?

Vino kwizakuwa na ludoko siku zose?

Wivu wako wizakwaka fana moto?

6 Uwetilile ludoko lwako wanhu wa zisi zose weli hawakumanyile,

na kwa falume, hawaditambikila zina jako.

7 Kwaviya wauja welesi wa Yakobo,

na waunanga ukazi wake.

8 Sekeukumbuke uhasanyi utendigwe umwaka,

ubazi wako wize himahima,

kwaviya chigaya ng'hani.

9 Weye Mulungu mulopozi wetu, uchitaze,

kwa ichimu cha ukulu wa zina jako.

Weye Mulungu uchikombole na uchilekelele uhasanyi wetu,

kwa ichimu cha zina jako.

10 Habali wanhu wolonga,

"Kakulihi Mulungu wawo?"

Chiwone viuwalihiliza damu ya wasang'hani wako itike.

11 Masozi ya lugano ya wafungwa yafike kumwako,

kwa udahi wako mkulu kuwalopola wanhu watagusigwe ifa.

12 Uwalihe miyanza saba wanhu wa zisi zimwenga,

kwa mbuli zawo zihile zowakulongile, weye Mndewa Mulungu.

13 Maabaho cheye wanhu wako, ng'hondolo wa bumbila jako,

chizakwing'ha hewela siku zose.

Chizagong'onda nhogolwa zako kwa nyelesi zose.