1 Mndewa Mulungu niijo bung'hulo jangu na ukombola wangu,

nimdumbe yelihi?

Mndewa Mulungu niiyo mhongono ya ugima wangu,

nimgudemekele yelihi?

2 Wehi wahanikwenhukila,

wahalonda kuninanga,

wezaikwala na kugwa.

3 Hata watowang'hondo wahanizinga,

muhe wangu hawizadumba chinhu.

One ng'hondo yahanilawilila,

baho nizamuhuwila Mulungu.

4 Nompula Mndewa Mulungu mbuli imwe,

mbuli iyo niiyo yoniizahila,

nidahe kukala muna ikaye yake,

siku zose za ugima wangu,

niuwone unovu wa Mndewa Mulungu,

na kumtambikila muna ikaye yake.

5 Kezanikaliza lusita lwa magayo,

kezanilolesa muna dihema jake,

kezanika hanhu goya uchanyha ya uluwe.

6 Maabaho nizawahuma wehi wangu wonizunguluka.

Nizamulavila Mulungu nhambiko kwa deng'ho mwiikaye yake,

nizakwimba na kumdeng'helela Mndewa Mulungu.

7 Weye Mndewa Mulungu, uhulike vonikulamba,

uniwonele ubazi na unidike.

8 Moyo wangu wonilongela, "Izo umtambikile Mulungu,"

"Nokutambikila, weye Mndewa Mulungu."

9 Sekeunifise chihanga chako.

Sekeumuleme msang'hani wako kwa ludoko,

weye kuwa mtazi wangu siku zose, sekeunyase.

Sekeunileke weye Mulungu wangu na mkombola wangu.

10 Hata one tati yangu na mama yangu wahanileka,

Mndewa Mulungu kezanihokela kumwake.

11 Weye Mndewa Mulungu, unifunze nzila yako,

unilongoze muna inzila igoloke,

kwaviya wehi wangu ni wengi.

12 Sekeuwaleke wehi wangu wanitende viwolonda,

kwaviya wasindila wa uvwizi wonikwenhukila,

nawo wogala woga wa usede.

13 Nizagendelela kuhuwila vino,

nizauwona unovu wake Mndewa Mulungu,

kuna iisi ya wagima.

14 Mgoze Mndewa Mulungu,

ugangamale na sekeudumbe,

umuhuwile Mndewa Mulungu.