1 Weye Mndewa Mulungu, nokutanga wize kumwangu himahima,

unihulike vonikupula.

2 Mbuli yonikupula uihokele fana ubani,

kwinula makono kwangu kuwe fana nhosa ya ichigulogulo.

3 Weye Mndewa Mulungu, wike mkalizi muna umulomo wangu,

muladi sekenilonge mbuli zihile.

4 Unikimilile sekenitende mbuli zihile,

sekenizowele sang'hano zihile,

hamwe na wanhu wotenda mbuli zihile,

hata sekenije ndiya zawo za madambwa.

5 Munhu yotenda mbuli zinogile yanitaguse na izakuwa ubazi,

yanikalikile na izakuwa fana mavuta muna iditwi jangu,

ditwi jangu sekedileme.

Mbali sileka kupula muladi sekenitende fana viwotenda wanhu wotenda mbuli zihile.

6 Wasemi wawo vondawagwisigwe kuna imiluwe,

wanhu wezategeleza mbuli zangu kwaviya zinoga.

7 Wezalonga, "Fana munhu viyolima na kuhimbula isi,

niivo mavuha yetu vondayapwililisigwe hana ihanhu ha kwingilila kuzimu."

8 Nokuhuwila weye Mndewa Mulungu, Mndewa wangu,

nokukimbilila weye sekeunileke nidanganike.

9 Unikimilile sekeningile muna umtego wawo,

kulawa kuna imitego ya wanhu wotenda mbuli zihile.

10 Wanhu wotenda mbuli zihile wagwe muna zinyavu zawo wenyewo,

mbali niye nifose vinogile.