1 Munhu yahalola ulanga, koumanya ukulu wa Mulungu,

langa dolagusa sang'hano ya makono yake.

2 Chila siku yolonga ukulu wa Mulungu,

chila ichilo yomfambula Mulungu viyeli.

3 Habule mbuli zilongeka,

hebu dizi dihulikika.

4 Mbali dizi jawo dohulikika muna izisi zose,

mbuli zawo zofika uhelelo wa isi yose.

Mulungu kadikila zuwa hanhu hake kuulanga,

5 dolawa fana msola viyolawa muna ichiheleto chake,

dodeng'helela fana munhu yohuma kuna ukukimbila.

6 Dosomoza ubanzi umwe wa kuulanga

na dozungulukila ubanzi umwenga.

Habule chinhu chidaha kuyepula na vuke jake.

7 Lagilizo da Mndewa Mulungu digoloka,

dombwelezela munhu ugima wa sambi,

ndagilizi za Mndewa Mulungu zohuwiligwa,

zoweng'ha ubala wanhu wabozi.

8 Malagilizo ya Mndewa Mulungu yanoga,

youdeng'heleza moyo,

lagilizo da Mndewa Mulungu jela,

dochitaza kuzimanya nzila zake.

9 Kumdumba Mndewa Mulungu kunoga,

na yeye kezadumbigwa siku zose.

Malagilizo ya Mndewa Mulungu ya kweli,

yose yagoloka.

10 Malagilizo yake yomeliligwa mate kufosa zahabu,

kufosa zahabu yelile ng'hani,

yamulile kufosa uki,

kufosa lala da uki.

11 Malagilizo yako yonizuma niye msang'hani wako,

wanhu woyazindilila wopata gweko kulu.

12 Yelihi youmanya ubananzi wake mwenyewo?

Weye Mndewa Mulungu unilekelele na ubananzi siumanyile.

13 Unikimilile niye msang'hani wako na ubananzi wa kuilunga,

sekeutogole uwo unitawale.

Baho nizakuwa nabule wihi,

na sizabananga ng'hani.

14 Mbuli za mulomo wangu na magesa ya moyo wangu,

zitogoleke haulongozi wako weye Mndewa Mulungu,

Mndewa Mulungu iyo luwe wangu na mulopozi wangu!