1 Mwimbileni Mndewa Mulungu wila wa sambi,

mweye wanhu wa zisi zose, mwimbileni Mndewa Mulungu.

2 Mwimbileni Mndewa Mulungu, ditogozeni zina jake,

chila siku gong'ondeni ukombola wake.

3 Muwagong'ondele wanhu wa zisi zose ukulu wake,

walongeleni wanhu wose sang'hano zake za mwazanyo.

4 Kwaviya Mndewa Mulungu mkulu na kotogozigwa ng'hani,

kodumbigwa na wanhu kufosa viidumbigwa milungu imwenga yose.

5 Kwaviya milungu yose ya zisi ni nyang'hiti muhala,

mbali Mndewa Mulungu niiyo yalumbile ulanga.

6 Hishima na ukulu kanavo yeye,

nguvu na unovu vahana ihanhu hake helile.

7 Mtogozeni Mndewa Mulungu, mweye wanhu wa chila isi,

mtogozeni Mndewa Mulungu yeli mkulu na yeli na nguvu.

8 Mtogozeni Mndewa Mulungu kwa ukulu wa zina jake,

galeni nhosa na mwingile muna zimbuga za kaye yake.

9 Mtambikileni Mndewa Mulungu yanogile na yelile,

wanhu wa zisi zose gudemekeni haulongozi hake.

10 Walongeleni wanhu wa zisi, "Mndewa Mulungu kotawala.

Kaitenda isi igangamale, haidaha kusegezigwa.

Kezawahumiza wanhu voilondeka."

11 Vilumbe wose wa kuulanga wadeng'helele,

wanhu wa isi wasekelele,

bahali na vose vili umo vibume.

12 Leka migunda na vose vili umo videng'helele,

na mibiki yose ya kumbago imbe kwa deng'ho haulongozi wa Mndewa Mulungu.

13 Kwaviya Mndewa Mulungu kokwiza,

kokwiza kuihumiza isi.

Kezazihumiza zisi voilondeka,

na kezazihumiza zisi kwa uwaminika wake.