1 Mwing'heni hewela Mndewa Mulungu, kwaviya kanoga,

kwaviya ulondo wake wa kufunya umoyo wokala siku zose.

2 Waja wakomboligwe na Mndewa Mulungu walonge mbuli izo,

niiyo waja wakomboligwe muna yamagayo.

3 Kawaduganya kulawa muna izisi zose,

kulawa ulawilo wa zuwa na uswelo wa zuwa,

kulawa kasikazi na kusi.

4 Wawegela muna ichuwala,

na hawawonile nzila ya kuwagala muna dibululu da kukala.

5 Wawona nzala na ng'hilu,

wabeneka moyo ng'hani.

6 Ivo muna yamagayo yawo wamulamba Mndewa Mulungu,

nayo kawalopola muna uzidilwa wawo.

7 Kawalongoza muna inzila igoloke,

mbaka wadifikila bululu da kukala.

8 Mwing'heni hewela Mndewa Mulungu kwa ulondo wake wa kufunya umoyo,

na kwa ichimu cha mauzauza yoyawatendele wanhu.

9 Yeye kowang'hwiza wanhu weli na ng'hilu,

na kowegutiza weli na nzala vinhu vinogile.

10 Wamwenga wakalile muna diziza da sisila da ifa,

wafungwa wakalile muna yamagayo na minyololo,

11 kwaviya wayehula malagilizo ya Mulungu,

na waizeha mbuli ya Mulungu Yeli Uchanyha Ng'hani.

12 Wakala walegele kwa sang'hano ndala,

wagwa hasi na hakukalile munhu yoyose wa kuwataza.

13 Ivo muna yamagayo yawo wamulamba Mndewa Mulungu,

nayo kawalopola muna uzidilwa wawo.

14 Kawalava muna diziza na uzidilwa wa ifa,

na minyololo yawo kaibenabena.

15 Mwing'heni hewela Mndewa Mulungu kwa ulondo wake wa kufunya umoyo,

na kwa ichimu cha mauzauza yoyawatendele wanhu.

16 Kwaviya kobena na kufungula nyivi za shaba,

na kukanhakanha mango za chuma.

17 Wamwenga wengila ubozi kwa ichimu cha uhasanyi wawo,

wengila magayo kwa ichimu cha wihi wawo.

18 Hawalondile kuja chinhu chochose,

wazikwenhukila nyivi ng'hulu za ifa.

19 Ivo muna yamagayo yawo wamulamba Mndewa Mulungu,

nayo kawalopola muna uzidilwa wawo.

20 Kwa mbuli yake kawahonya,

kawakombola muladi sekewanangigwe.

21 Mwing'heni hewela Mndewa Mulungu kwa ulondo wake wa kufunya umoyo,

na kwa ichimu cha mauzauza yoyawatendele wanhu.

22 Wamulavile nhambiko za hewela,

na kusimulila sang'hano zake kwa nyila za deng'ho.

23 Wamwenga wagenda mwiibahali kwa meli,

na kutenda sang'hano zawo umo muna ibahali.

24 Waziwona sang'hano za Mndewa Mulungu,

waziwona mbuli za mauzauza zozitendigwe uko.

25 Mana kalonga na kagala beho kulu,

diyenule mawimbi ya bahali.

26 Wasigwa mchanyha kuulanga, maabaho hasi hagidimile,

ugalu wawo uwamalila muna uzidilwa uwo.

27 Wayumbayumba na wazazalika fana munhu yakoligwe,

ugalu wawo wose umala.

28 Wamulamba Mndewa Mulungu muna yamagayo yawo,

kawalopola muna uzidilwa wawo.

29 Kanyamaliza tibwilitibwili,

na mawimbi yahupika.

30 Baho wadeng'helela kwaviya bahali ihupika,

kawafikiza kuna ichiloko chowochihitila.

31 Mwing'heni hewela Mndewa Mulungu kwa ulondo wake wa kufunya umoyo,

na kwa ichimu cha mauzauza yoyawatendele wanhu.

32 Mtogozeni muna umting'hano wa wanhu,

na mumtogoze muna dilundo da walala.

33 Mulungu koigalusa mizanda kuwa bwilingu,

na kozigalusa nzasa zinyale.

34 Koigalusa isi ili na ulongo unogile kuwa na ulongo wa munyu,

kwa ichimu cha mbuli zihile za wakaya wokala uko.

35 Kogalusa bwilingu kuwa malamba ya mazi,

na isi inyalile kuwa nzasa za mazi.

36 Kowagala wanhu weli na nzala muna iisi iyo,

na wozenga bululu da kukala.

37 Wolima migunda na wohanda mizabibu,

na wogobola vinhu vawo mvunyo.

38 Kowatemela mate wanhu wake na wokongezeka.

Hayahunguza mabumbila ya wanyama wawo.

39 Wehi wawo wohunguka na wokuwa nyondenyonde,

kwa kuwoniligwa na magayo na usungu.

40 Kawazeha wakulu,

na kawatenda wawegele mwiichuwala chilibule nzila.

41 Mbali kowakombola waja wolonda kutazigwa muna uuzidilwa wawo,

na kongeza welesi wawo fana bumbila da ng'hondolo.

42 Weli na moyo unogile wowona na wodeng'helela,

mbali wanhu wotenda mbuli zihile wonyamazigwa.

43 Weli na ubala wazilole mbuli izo,

waugese ulondo wa kufunya umoyo wa Mndewa Mulungu.