1 Mndewa Mulungu ni mkulu na kolondeka yatogoligwe ng'hani,

yatogozigwe muna dibululu jake na muna umulima wake welile.

2 Sayuni mulima mtali wa Mulungu ulinga fana mulima Zafoni,

bululu kulu da mfalume, dowatenda wanhu wa zisi zose wadeng'helele.

3 Mulungu kozikaliza mhongono zake,

yeye kowakaliza vinogile wanhu wa bululu ijo.

4 Wafalume wamwenga waiduganya,

weza wose hamwe kuditowa bululu diya.

5 Mbali viwadiwone bululu da Sayuni,

wazanywa na wakimbila.

6 Wadumba ng'hani,

fana muke yolumwa usungu.

7 Wadumba fana waja wohembelusigwa na beho da ulawilo wa zuwa,

dozibena meli ng'hulu za Talishishi.

8 Fana vichihulike, ivo vichiwonile,

muna dibululu da Mndewa Mulungu Yeli na Udahi Wose,

muna dibululu da Mulungu wetu,

diya dondayadigangamize Mulungu siku zose.

9 Weye Mulungu wetu, muna ikaye yako,

chougesa ulondo wako wa kufunya umoyo.

10 Fana vidili kulu zina jako, weye Mulungu,

niivo ili nhogolwa yako mbaka uhelelo wa isi,

kotawala voilondeka.

11 Mulima Sayuni wodeng'helela,

mabululu ya Yuda yosekelela,

kwa ichimu cha kuhumiza kwako.

12 Gendeni Sayuni mkadizinge bululu diya,

peteni malingo yake.

13 Ziloleni ng'huta zake vinogile,

na muzipelembe mhongono zake,

mudahe kuwalongela welesi wenu ukwiza.

14 Kwaviya niivo yeli Mulungu, Mulungu wetu siku zose,

kezakuwa mulangulizi wetu siku zose.