1 Weye Mndewa Mulungu kuupekula moyo wangu,

kunimanya vinogile ng'hani.

2 Nahakala hasi hebu nahenuka, weye kuvimanya,

kuyamanya magesa yangu hata uhawa kutali.

3 Kovimanya vonigenda na vonigona

komanya chila chinhu chonisang'hana.

4 Ing'hali mbuli hainafika muna ululimi lwangu,

weye Mndewa Mulungu, kulongola kuimanya mbuli iyo.

5 Kunizinga kuchisogo na kuulongozi,

kwika mkono wako uchanyha yangu kunikaliza.

6 Sidaha kuimanya mbuli iyo ya mwazanyo,

kwaviya mbuli iyo ndala ng'hani kumwangu.

7 Nihite kulihi niinege na muhe wako?

Nihite kulihi nichikimbile chihanga chako?

8 One nihakwela kuulanga, weye kwauko,

one nihatenda kuzimu kuwa komwa jangu, weye kwauko.

9 One niguluke mbaka ulawilo wa zuwa,

na kuhita kutali kuna zimhaka za bahali za ubanzi wa uswelo wa zuwa.

10 Uko iviya mkono wako wizanilongoza,

mkono wako wa kulume wizanyamhisa.

11 Nodaha kulonga, "Kweli ziza dizanifisa,

na bung'hulo donizunguluka dihagaluka kuwa ichilo,"

12 mbali ziza hadizakuwa ziza kumwako,

ichilo izakuwa fana imisi,

na ziza dizakuwa fana bung'hulo kumwako.

13 Kwaviya weye niiyo unilumbile,

kunitenda nikule muna iinda ya mami yangu.

14 Nokutogoza kwaviya nilumbigwa kwa mauzauza,

sang'hano zako za mwazanyo,

nozimanya vinogile ng'hani.

15 Vonilumbigwe kwa mvisa,

vinitendigwe hana ihanhu hahawoneka,

mavuha yangu hayafisigwe kumwako.

16 Meso yako yaniwona ning'hali muna iinda ya mami yangu,

siku zangu zose zounikile zandikigwa muna ichitabu chako,

ning'hali sinawona zuwa.

17 Mulungu, magesa yako yazama ng'hani kumwangu,

magesa yako hayadaha kupeteka.

18 One niyapetile,

yahawile mengi kufosa msanga.

Vinilamuka, nahamwe na weye.

19 Weye Mulungu, uwakome wanhu wotenda mbuli zihile.

Mweye wakomaji, inegeni kumwangu.

20 Wokulonga mbuli zihile,

wehi wako wodilonga vihile zina jako.

21 Nowehila wanhu wokwihila weye Mndewa Mulungu,

nowehula ng'hani wanhu wokulema.

22 Nowehila ng'hani,

na wawa wehi wangu.

23 Weye Mulungu, unipekule muladi uumanye moyo wangu,

nigeze muladi umanye viniwa na lugano.

24 Ulole one kuna magesa yehile muna umoyo wangu,

unilongoze muna inzila yako.