1 Moyo wangu wogesa mbuli zinogile,

nomulongela wila unogile mfalume,

lulimi lwangu lulinga fana kalamu ya mwandikaji yanogile.

2 Weye mfalume, kuna chihanga chinogile kufosa wanhu wose,

na kolonga mbuli zinogile.

Ivo Mulungu kakutemela mate siku zose.

3 Weye uli galu wa ng'hondo, ifunge panga jako hana ichigudi,

weye kwa mkulu na kotogozigwa.

4 Kwela falasi wako na genda kwa udahi wako muladi uhume,

ugombele kwa kuwinza inhululika na kuukaliza ukweli.

Mkono wako wa kulume utende mbuli ng'hulu.

5 Misale yako yokutwa,

yohoma mizoyo ya wehi wako,

wanhu wogwa hasi yako.

6 Weye Mulungu, chigoda chako cha chifalume ni cha siku zose,

kotawala voilondeka na fimbo yako ya chifalume.

7 Weye kolonda mbuli zinogile na kokwihila mbuli zihile,

ivo Mulungu, Mulungu wako, kakuhaka mavuta

na kakutenda udeng'helele na winuligwe kufosa wayago.

8 Mawalo yako yonung'hila goya udi na mdalasini,

wembaji wokwimbila muna zikaye zozihambigwa goya,

wanhu wokudeng'heleza kwa kutowa bango.

9 Wandele wa wafalume wamwenga wokusang'hanila kwa hishima,

muke yolonda kusoligwa na mfalume kema ubanzi wako wa kulume,

kaihamba mahambo ya zahabu inogile kulawa uko Ofili.

10 Weye mndele usoligwa, kinga digutwi utegeleze,

uwazimize wanhu wako na kaye ya tati yako.

11 Mfalume kezanogelwa na unovu wako.

Yeye niiyo mwenevale wako, umsang'hanile.

12 Wanhu wa Tilo wolonda kukunogeza kwa kukugalila vitumetume,

wanhu weli na vinhu vingi wezazahila unovu wako kufosela vitumetume vingi.

13 Mhambe yosoligwa na mfalume kokwingila muna ikaye ya mfalume kwa kunogeza ng'hani,

mawalo yake yahogosigwa kwa singija za zahabu.

14 Kogaligwa kwa mfalume,

na mawalo yafumigwe goya,

wali wayage wowomsondelela, iviya wahita kwa mfalume.

15 Wezagaligwa kwa deng'ho na ng'henze,

kuno wokwingila muna ikaye ya mfalume.

16 Weye mfalume, welesi wako wezakuwa wafalume fana wasaho zako,

kwizawatenda kuwa walangulizi wa isi yose.

17 Nizaditenda zina jako dikumbukigwe na nyelesi zose,

wanhu wa zisi zimwenga wezakutogoza siku zose.