1 Weye Mndewa Mulungu uhulike chiya chonipula,

uhulike vonikupula unitaze.

2 Sekeunifise chihanga chako muna isiku ya uzidilwa wangu,

ukinge digutwi jako,

unidike himahima lusita vinikupula.

3 Siku zangu zokwaga fana yosi,

mavuha yangu yolungula fana kala da moto.

4 Nibojogigwa muumoyo fana viya misavu na kunyala,

na nizimiza kuja ndiya yangu.

5 Kwa ichimu cha kugutilila kwangu,

nisigala mavuha muhala.

6 Nadumwe fana ndege wa kuchuwala,

nadumwe fana bundi matuwa muna yamatongo.

7 Nogona meso,

niwa fana ndege yeli dumwe muichisuwili.

8 Wehi wangu woning'ong'a siku yose,

waja wonizunguluka wodisang'hanila zina jangu kwa kuduwila.

9 Noja maivu fana ndiya,

masozi yolagalila muna iching'waji changu,

10 kwa ichimu cha ludoko lwako.

Kuninula na kunyasa kumgwazo.

11 Siku zangu zofosa fana sisila da ichigulogulo,

nonyala fana mayani.

12 Mbali weye Mndewa Mulungu kokala muna ichigoda chako cha chifalume siku zose,

zina jako dizakumbukigwa na nyelesi zose.

13 Weye kwizakwinuka na kudiwonela ubazi bululu da Sayuni,

kwaviya lusita lufika lwa kuditendela mbuli zinogile,

lusita louwikile lufika.

14 Kwaviya wasang'hani wako wayanogela mabwe ya bululu da Sayuni,

na kuyawonela ubazi matimbwisi yotimuka lusita lwa kubomola.

15 Wanhu wa zisi wezadidumba zina da Mndewa Mulungu,

wafalume wose mwiisi wezadumba ukulu wako.

16 Mndewa Mulungu kezadizenga kaidi bululu da Sayuni,

vondauwoneke ukulu wake.

17 Kezawedika chiwopula wachiwa,

hezalema chiwopula.

18 Mbuli ino yandikigwe kwa ichimu cha welesi ukwiza,

muladi wanhu wondawaumbigwe hamwande, wamtogole Mndewa Mulungu.

19 Mndewa Mulungu kalola hasi kulawa hanhu hake helile,

kalola isi kulawa kuulanga,

20 muladi yawategeleza wafungwa viwolila kwa usungu,

na yawatende wailegehe waja watagusigwe kudanganika.

21 Ivo zina da Mndewa Mulungu dizagong'ondigwa uko Sayuni,

na nhogolwa zake zizagong'ondigwa uko Yelusalemu,

22 wanhu na falume vondawaiting'hane hamwe,

muladi kumtambikila Mndewa Mulungu.

23 Mulungu kanihunguzila nguvu ning'hali mdodo,

kauhunguza ugima wangu.

24 Ivo nilonga,

"Weye Mulungu wangu,

sekeunisole sambi ning'hali mbwanga,

weye kokala nyelesi zose."

25 Umwaka kwika chandusilo cha isi,

na ulanga ni sang'hano ya makono yako.

26 Vinhu ivo vizawola, mbali weye kwizakala,

vose vizasakala fana mawalo,

navo vizasegela.

27 Mbali weye niiyo ija ija,

na miyaka yako haizamala.

28 Wana wa wasang'hani wako wezakala haulongozi wako,

na welesi wawo wezakwikigwa goya haulongozi wako.