1 Kweli Mulungu kanoga kwa Waisilaili,

kwa waja weli na moyo unogile.

2 Isigala hadodo niikwale,

isigala hadodo nitelebuke,

3 kwaviya niwawonela migongo waja weli na magoda,

viniwawonile wanhu wotenda mbuli zihile wopata chiwolonda.

4 Wabule usungu muna iifa yawo,

ng'huli zawo zitelela na zigangamala.

5 Hawagaya fana viwogaya wanhu wamwenga,

na hawapata manhesa fana viwopata manhesa wanhu wamwenga.

6 Ivo magoda yawa fana usalu muna zisingo zawo,

na usede ni fana mawalo yawo.

7 Wihi wolawa muna imizoyo yawo,

magesa yehile mengi yolawa muna imizoyo yawo.

8 Wowaseka wamwenga na wowawonela,

woigoda na woilungila kutenda vinhu vihile.

9 Kwa milomo yawo wolonga woulanguliza ulanga,

kwa mbuli zawo woitogoza muna iisi.

10 Ivo, wanhu wowategeleza,

hawawona dihile jojose kumwawo

na wotogola chila mbuli yowolonga.

11 Wolonga, "Mulungu kodahaze kuvimanya?

Vino yeye Yeli Uchanyha Ng'hani kanawo umanyi?"

12 Vino niivo viwokuwa wanhu wotenda mbuli zihile,

wana chila chinhu na wopata vinhu vimwenga.

13 Kweli niusafya moyo wangu, mbali haifaiye chinhu,

na ninawa makono yangu muladi sekenitende uhasanyi.

14 Nigazigwa imisi yose,

nitagusigwa chila imitondo.

15 One nilongile fana wawo,

nihawile mdelenya kwa wanago.

16 Mbali vinigezile kuvimanya mbuli zino zose,

iwa vidala ng'hani kumwangu,

17 mbaka voningile muna ikaye ya Mulungu,

niumanya uhelelo wawo.

18 Kweli weye Mndewa Mulungu kuweka hanhu hotelebuka,

kuwatenda wagwile hehile.

19 Viya viwanangigwa kwa kusinhukila,

wosegezigwa muna iisi kwa vinhu va kudumbiza.

20 Wage fana nzozi viikwaga lusita lwa kulamka,

weye Mndewa, vondaulamke kwizawehula.

21 Viniwonile usungu muna umoyo,

na viningiligwe na luholozi muumoyo,

22 simanyile chinhu chochose,

niwa mbunye fana mnyama haulongozi wako.

23 Mbali niye nahamwe na weye siku zose,

kunyamha mkono wangu wa kulume.

24 Konilongoza kwa ubala wako,

maabaho kwizanihokela kwa hishima.

25 Nabule imwenga kuulanga mbali weye,

habule chinhu chonilonda muna iisi mbali weye.

26 One nihapuwa nguvu muna ulukuli lwangu na muna umoyo,

weye Mulungu konitendeza niwe na nguvu siku zose.

Nikusagula weye siku zose.

27 Kwaviya waja woinega na weye wezakwaga,

kuwananga wose wakulekile weye.

28 Mbali niye nowona vinoga niwe habehi na Mulungu,

nimtenda Mndewa Mulungu kimbililo jangu,

nizazigong'onda sang'hano zake zose.