1 Weye Mndewa Mulungu, Mulungu ulihiliza,

weye Mulungu ulihiliza uilaguse.

2 Winuke weye mwene kuihumiza isi,

uwataguse weli na magoda viya voilondeka.

3 Mndewa Mulungu, vino wanhu wotenda mbuli zihile wezadeng'helela mbaka zuwaki?

4 Mbuli zawo za magoda zolawa fana mazi yokuluma.

Wotenda mbuli zihile wose wamema magoda.

5 Wowananga wanhu wako, weye Mndewa Mulungu,

woubananga uhazi wako.

6 Wowakoma wagane na nyambenyambe,

wowakoma wachiwa.

7 Wolonga, "Mndewa Mulungu halola,

Mulungu wa Yakobo havimanyile."

8 Muiteganye mweye wanhu wabozi ng'hani,

mweye mambunye, mwizavimanya zuwaki?

9 Yatendile digutwi hadahaze kuhulika?

Yalumbile ziso hadahaze kulola?

10 Yowazuma wanhu wa zisi hadahaze kutagusa?

Yofundiza wanhu hadahaze kuvimanya?

11 Mndewa Mulungu kayamanya magesa ya wanhu,

kayamanya kuwa hayafaya.

12 Wamweda wanhu waja wozumigwa na weye Mndewa Mulungu,

wanhu wouwafunza malagilizo yako.

13 Kowahonya siku ya magayo,

mbaka wanhu wotenda mbuli zihile vondawahimbiligwe maleme.

14 Mndewa Mulungu hezawaleka wanhu wake,

na hezawasa weli uhazi wake.

15 Wanhu wezahumizigwa fana voilondeka,

na wose wotenda mbuli zinogile wezatogola.

16 Yelihi yondayanitaze kuwalema wehi?

Yelihi yondayanikalize na wanhu wotenda mbuli zihile?

17 One Mndewa Mulungu hanitazile,

nihakalile hanhu ha ifa hahupike.

18 Vinilongile, "Mgulu wangu wotelebuka,"

baho ulondo wako Mndewa Mulungu unitaza.

19 Baho nikala na magesa mengi muna umoyo wangu,

utazi wako wousangalaza moyo wangu.

20 Weye hudaha kuilumba na watawala wehile,

wowogala magayo kwa malagilizo yawo.

21 Wawo woitogolela kuwakoma wanhu wotenda mbuli zinogile,

kuwatagusa ifa wanhu welibule ubananzi.

22 Mbali weye Mndewa Mulungu niiyo mhongono yangu,

weye ni luwe lwangu lwa kukimbilila.

23 Kwizawaliha kwa uhasanyi wawo,

kwizawananga kwa wihi wawo,

Mndewa Mulungu, Mulungu wetu, kwizawananga.