1 Weye Mulungu uniwonele ubazi,

kwaviya wehi wangu wonigaza siku zose,

wonibamanya imisi na ichilo.

2 Wehi wangu wonisondelela imisi yose,

na wanhu wengi wonitowa.

3 Nihadumba,

nizakuhuwila weye.

4 Nizaitogoza mbuli ya Mulungu.

Nomuhuwila Mulungu, ivo sizadumba.

Munhu kezanitenda choni?

5 Imisi yose wogalula mbuli zangu,

lusita lose woilungila kunitendela mbuli zihile.

6 Woiting'hana na woifisa na wolola monifosile,

kwaviya wanisepa muladi wanikome.

7 Weye Mulungu uwalihe kwa wihi wawo,

uwanange wanhu wa zisi zimwenga kwa ludoko lwako.

8 Yandika manhesa yonili nayo,

yeke goya masozi yangu.

Vino yano hayeli muna ichitabu chako cha lukumbuso?

9 Maabaho wehi wangu wezabwela kuchisogo

siku vondanikutange unitaze.

Lelo novimanya kuwa Mulungu kaubanzi wangu.

10 Kwa kutazigwa na Mulungu nizaitogoza mbuli yake,

kwa kutazigwa na Mndewa Mulungu nizaitogoza mbuli yake.

11 Nomuhuwila Mulungu, ivo sizadumba.

Munhu kezanitenda choni?

12 Weye Mulungu, nizatenda fana viniilahile,

nizakulavila nhambiko zangu za hewela.

13 Kwaviya kunikombola kulawa muna iifa,

hunilekile niikwale,

muladi nigende haulongozi wa Mulungu,

hana dibung'hulo dodigala ugima.