1 Mwing'heni hewela Mndewa Mulungu kwaviya kanoga,

ulondo wake wa kufunya umoyo wokala siku zose.

2 Waisilaili walonge,

"Ulondo wake wa kufunya umoyo wokala siku zose."

3 Welesi wa Haluni walonge,

"Ulondo wake wa kufunya umoyo wokala siku zose."

4 Wanhu womdumba Mndewa Mulungu walonge,

"Ulondo wake wa kufunya umoyo wokala siku zose."

5 Muna yamagayo yangu nimtanga Mndewa Mulungu,

Mndewa Mulungu kanidika na kanikombola.

6 Mndewa Mulungu kahamwe na niye, sizadumba.

Vino munhu kodaha kunitenda choni?

7 Mndewa Mulungu kahamwe na niye kunitaza,

ivo nizawawona waja wonihila wopotigwa.

8 Muhavu kumkimbilila Mndewa Mulungu

kufosa kumuhuwila munhu.

9 Muhavu kumkimbilila Mndewa Mulungu,

kufosa kuwahuwila wafalume.

10 Wanhu wa zisi zimwenga wanizunguluka,

mbali kwa zina da Mndewa Mulungu niwahuma.

11 Wanizunguluka banzi zose,

mbali kwa zina da Mndewa Mulungu niwahuma.

12 Wanizunguluka fana nyuki,

mbali watakamila fana viya mbaya inyalile viikwaka,

kwa zina da Mndewa Mulungu niwahuma wehi wangu.

13 Nisung'higwa kwa nguvu nigwe hasi,

mbali Mndewa Mulungu kanigangamiza na kunikaliza.

14 Mndewa Mulungu iyo yonigangamiza na kunigombela,

kanikombola kulawa kwa wehi wangu.

15 Madizi ya wanhu wodeng'helela kuhuma,

yohulikika muna yamahema ya wanhu wotenda mbuli zinogile,

"Mkono wa kulume wa Mndewa Mulungu wotenda mbuli ng'hulu!

16 Mkono wa kulume wa Mndewa Mulungu winuligwa uchanyha,

Mkono wa Mndewa Mulungu unitaza kuwahuma wehi!"

17 Sizadanganika, mbali nizakuwa mgima,

nizazisimulila sang'hano zoyatendile Mndewa Mulungu.

18 Mndewa Mulungu kanitagusa ng'hani,

mbali hanilekile nidanganike.

19 Nivugulileni nyivi za Kaye ya Mulungu,

nizakwingila na kumwing'ha hewela Mndewa Mulungu.

20 Uno niuwo lwivi lwa Mndewa Mulungu,

wanhu wotenda mbuli zinogile wezakwingila umo.

21 Nokwing'ha hewela kwaviya kunidika,

weye kuwa mkombola wangu.

22 Dibwe dowalemile wazenzi kuzengela,

diwa dibwe dinogile kufosa mabwe yose ya kuzengela.

23 Mndewa Mulungu kachitenda chinhu chino,

na chiwa chinhu cha mwazanyo ng'hani kumwetu.

24 Iyo ni siku yoyaitendile Mndewa Mulungu,

kwa ichimu chake chideng'helele na kusekelela.

25 Weye Mndewa Mulungu chokupula uchikombole,

weye Mndewa Mulungu chokulamba uchitemele mate.

26 Yatemeligwe mate yokwiza kwa zina da Mndewa Mulungu,

muna Ikaye ya Mulungu chowatemela mate mweye.

27 Mndewa Mulungu niiyo Mulungu,

nayo niiyo yachimwemwesele bung'hulo,

yamheni matambi muna umkono,

muilumbe hamwe kutenda dugila,

mbaka kuna zimhembe za lupango.

28 Weye niiyo Mulungu wangu, nokwing'ha hewela

weye niiyo Mulungu wangu, nizakutogoza.

29 Mwing'heni hewela Mndewa Mulungu kwaviya kanoga,

ulondo wake wa kufunya umoyo wokala siku zose.