1 Izoni chimwimbile Mndewa Mulungu kwa deng'ho,

chimdeng'helele yeye yeli luwe yochikombola.

2 Chize kuulongozi wake kwa hewela,

chimdeng'helele kwa nyila za nhogolwa.

3 Kwaviya Mndewa Mulungu ni Mulungu mkulu,

na mfalume mkulu wa milungu yose.

4 Kotawala zisi zose, kwandusila ikombo da isi digidimile ng'hani,

iviya kotawala ludonho lwa milima.

5 Bahali ni yake, kwaviya niiyo yoyaitendile,

isi kailumba yeye.

6 Izoni, chitumbale mavindi chimtambikile,

chitumbale mavindi haulongozi wa Mndewa Mulungu yachilumbile.

7 Kwaviya niiyo Mulungu wetu,

na cheye ni wanhu wake,

cheye ng'hondolo wochidimigwa na yeye.

One diyelo muhahulika dizi jake,

8 sekemuitende mizoyo yenu kuwa midala,

fana vimutendile uko Meliba,

na fana vimutendile siku ija kuja Masa kuichuwala.

9 Baho wasaho zenu wanigeza,

wagendelela kunigeza, ingawa wawona sang'hano zonitendile.

10 Kwa miyaka malongo mane niwihila welesi uja,

nilonga, "Magesa ya wanhu wano yaga,

wolema kuzindilila ndagilizi zangu."

11 Ivo niilaha kwa ludoko lwangu,

"Hawezakwingila hanhu honiwasasalile kuhumula."