1 Munhu yokala hanhu heli na ukalizi wa Mulungu Yeli Uchanyha Ng'hani,

kezahumula hana disisila da Mulungu Yeli na Udahi.

2 Nomulongela Mndewa Mulungu,

"Weye niiyo kimbililo jangu na mhongono yangu,

Mulungu wangu yonikuhuwila."

3 Kweli Mulungu kezakulopola kulawa kuna umtego,

na kukukimilila sekeupate mitamu ihile.

4 Kezakugubika kwa machipilo yake,

kwizakimbilila hasi ya mabawa yake,

uwaminika wake ni kimililo na ukalizi.

5 Hwizadumba vinhu va kudumbiza va ichilo,

hwizadumba msale uzumha imisi.

6 Hwizadumba mahulo yokwiza ichilo,

iviya hwizadumba mahulo yolawilila imisi.

7 Hata wanhu elufu wahadanganika kwa mahulo,

hebu elufu longo wahagwa habehi na weye,

mbali weye, mahulo hayezakukwenhukila.

8 Kwa meso yako mwenyewo kwizalola,

na kuwona wanhu wotenda mbuli zihile viwotagusigwa.

9 Weye kumtenda Mndewa Mulungu kuwa kimbililo jako,

kumtenda Yeli Uchanyha Ng'hani kuwa hanhu haholile fana kaye yako.

10 Mbuli zihile hazizakupata,

na hulo hadizakwenhukila hema jako.

11 Kwaviya kezakulagilizila wasenga wake wa kuulanga,

wakukalize hohose hondaugende.

12 Wezakusola muna yamakono yawo,

muladi sekeuikwale muna idibwe.

13 Kwizawahuma simba na mazoka,

kwizawabojoga ng'hani simba weli na nguvu na mazoka.

14 Mndewa Mulungu kolonga, "Nizamkombola ija yonilonda,

nizamkaliza kwaviya konitogola niye Mulungu wake.

15 Yahanitanga, nizamwidika,

nizakuwa hamwe nayo muna uuzidilwa,

nizamkombola na kumwing'ha hishima.

16 Nizamwing'ha chila chinhu chiyolonda muladi yakale siku nyingi,

na nizamkombola."