1 Nomulonda Mndewa Mulungu,

kwaviya kanihulika dizi jangu,

kanitegeleza vinimpulile yaniwonele ubazi.

2 Nomulonda kwaviya chila lusita vinimpula, yeye konhegeleza.

Ivo nizampula siku zose za ugima wangu.

3 Nzabi za ifa zinizunguluka,

mawine makulu ya kuzimu yamhata,

nipatigwa na magayo na lugano.

4 Maabaho niditanga zina da Mndewa Mulungu,

"Mndewa Mulungu, nokulamba, unilopole!"

5 Mndewa Mulungu kana unovu na haki,

Mulungu wetu kana ubazi.

6 Mndewa Mulungu kowakaliza wanhu wozahila kuvimanya kukala goya,

vinikalile muna yamagayo kanikombola.

7 Weye moyo wangu bwela hanhu hako ha kuhumula,

kwaviya Mndewa Mulungu kakutendela mbuli zinogile.

8 Kwaviya weye Mndewa Mulungu kunilopola muna iifa,

na kunihangusa masozi yangu,

iviya kunikaliza magulu yangu sekeniikwale.

9 Nizakala kwa kumtegeleza Mndewa Mulungu,

muna iisi ya wanhu wagima.

10 Nimuhuwila Mndewa Mulungu vinilongile,

"Niye nosafagila ng'hani."

11 Nilonga bila kugesa,

"Wanhu wose wavwizi."

12 Nimbwelezele choni Mndewa Mulungu,

kwa vinhu vose vinogile voyanhendele?

13 Nizamulavila nhosa ya divai ya ulopozi,

Nizapula kwa zina da Mndewa Mulungu.

14 Nizafikiza vilaho vangu kwa Mndewa Mulungu,

na haulongozi wa wanhu wake wose.

15 Ifa ya wanhu wake wokwaminika,

si mbuli ndodo haulongozi wa Mndewa Mulungu.

16 Weye Mndewa Mulungu, niye msang'hani wako kweli,

niye msang'hani wako mwana wa msang'hani wako wa chike,

kuizuhula minyololo yangu.

17 Nizakulavila nhambiko ya hewela,

na nizapula kwa zina da Mndewa Mulungu.

18 Nizavifikiza vilaho vangu kwa Mndewa Mulungu,

na haulongozi ha wanhu wake wose.

19 Nizavifikiza muna ulubuga lwa kaye ya Mndewa Mulungu,

mgati yako, weye Yelusalemu.

Mndewa Mulungu yatogolwe.