1 Weye Mulungu yonikutogoza, sekeunyamale.

2 Kwaviya wanhu wotenda mbuli zihile na wavwizi,

wonigubulila milomo yawo,

wonilonga kwa uvwizi.

3 Wonilonga mbuli zihile,

woitowa na niye bila chimu chochose.

4 Niwalonda mbali wawo wanilongeleza.

Na niye nowapulila.

5 Waniliha mbuli zihile kwa mbuli zinogile zoniwatendele,

na waniliha wihi kwa ulondo wangu.

6 Umsagule munhu yotenda mbuli zihile yamulongeleze mwihi wangu,

na munhu yomulongeleza yeme ubanzi wake wa kulume.

7 Yahahumizigwa, kezawoneka katenda mbuli zihile,

mbaka mbuli ziyopula zizawoneka kuwa uhasanyi.

8 Siku zake ziwe ndodo,

munhu imwenga yasole sang'hano yake ya ulangulizi.

9 Wanage wawe wachiwa,

muke wake yawe mkefilwa.

10 Wanage wezawegela na kupulapula,

wawingigwe muna yamatongo yawo.

11 Munhu yomdai chinhu yamuhoke vinhu vake vose,

na nyambenyambe wasole sang'hano yake.

12 Sekeyawe uko munhu wa kumuwonela ubazi,

sekeyawe uko munhu wa kuwagesa wachiwa wake.

13 Welekwa wake wose wadanganizigwe,

zina jake dizimizigwe muna izinyelesi zikwiza.

14 Mndewa Mulungu yaukumbuke wihi wa walala wake,

uhasanyi wa mami yake sekeusegezigwe.

15 Mndewa Mulungu yaukumbuke uhasanyi wawo siku zose,

mbali wawo wenyewo wazimizigwe muna iisi.

16 Kwaviya munhu ija hagesile kutenda mbuli zinogile,

mbali kamuwinga ngayengaye na munhu yolonda kutazigwa,

mbaka munhu yabeneke umoyo kadanganika.

17 Kalonda kuwaduwila wanhu mbali duwilo dimpata mwenyewo,

halondile kuwatemela mate wamwenga, nayo iviya hatemeligwe mate.

18 Kaiyawala duwilo fana viya walo jake,

dimwingila muumoyo fana viya mazi viyong'wigwa,

na fana viya mavuha yake viyofonza mavuta.

19 Duwilo dimgubike fana walo,

dimzunguluke fana viya mkwiji.

20 Mndewa Mulungu yawalihe wanhu wonilongeleza,

waja wonilonga vihile.

21 Mbali weye Mndewa Mulungu, Mndewa wangu,

unitendele mbuli zinogile kwa ichimu cha zina jako.

Kwa ichimu cha ulondo wako wa kufunya umoyo, unikombole.

22 Kwaviya niye ngayengaye na nolonda kutazigwa,

na moyo wangu wolumila.

23 Nosegela fana sisila da ichigulogulo,

nohembelusigwa fana nzige.

24 Mavindi yangu yalegela kwa ichimu cha kufunga kuja,

lukuli lwangu lusoka.

25 Niwa munhu wa kuzehigwa na wehi wangu,

wahaniwona wotingisa matwi yawo.

26 Weye Mndewa Mulungu, Mulungu wangu unitaze,

unikombole kwa ulondo wako wa kufunya umoyo.

27 Wanhu wavimanye kuwa niuwo mkono wako,

wavimanye kuwa weye Mndewa Mulungu, kuzitenda mbuli izo.

28 Wawo wahaduwila, weye konitemela mate,

wanhu wose wonitowa niye, kowaguma chinyala,

mbali niye msang'hani wako nodeng'helela.

29 Waja wonilongeleza wavazigwe chinyala fana walo,

na waigubike chinyala fana mgolole.

30 Nizamwing'ha hewela Mndewa Mulungu kwa mulomo wangu,

nizamtogoza hana ulung'husesa.

31 Kwaviya yeye kokwima mkono wa kulume wa munhu yolonda kutazigwa,

muladi kumkombola kulawa kwa wanhu womtagusa.