1 Yatogozigwe Mndewa Mulungu yeli luwe wangu,

yoyofundiza ng'hondo makono yangu,

yoyofundiza vidole vangu kwiitowa.

2 Yeye niiyo Mulungu wangu wa ulondo na mhongono yangu,

niiyo kimbililo jangu na mkombola wangu,

na ngao yangu yonikimbilila.

Kowahuma wanhu wa zisi muladi niwatawale.

3 Weye Mndewa Mulungu, munhu kofaya choni mbaka ummanye?

Munhu kofaya choni mbaka umgese?

4 Munhu kalinga fana mhumuzi,

siku zake zilinga fana sisila dodifosa.

5 Weye Mndewa Mulungu uhumuluke kwa nguvu,

uidalise milima muladi ilave yosi.

6 Utende lumwemwe luwapwililise wehi wako,

uwatowe misale wehi wako na uwagume chinyala.

7 Ugolose mkono wako kulawa kuchanyha unikombole,

na kunisegeza muna yamazi yano mengi,

unilopole kulawa muna yamakono ya wanhu wa zisi zimwenga.

8 Milomo yawo yolonga mbuli za uvwizi,

na hawalonga ukweli.

9 Weye Mulungu wangu, nizakwimbila wila wa sambi,

nizakwimbila kwa chia cha nyila chili na singija longo.

10 Koweng'ha ukombola wafalume,

komkombola Daudi msang'hani wako na panga dodikoma.

11 Unikombole na unilopole kulawa kwa wanhu wa zisi zimwenga.

Milomo yawo yolonga mbuli za uvwizi,

na hawalonga ukweli.

12 Maabaho wanetu wa chilume,

wakule vinogile fana mbiki ukangale,

wandele wetu wawe fana mhanda za mgomba,

zozisongoligwe kuhambila hoyokala mfalume.

13 Madungu yetu yameme ndiya mbasakanyo,

ng'hondolo wetu weleke maalufu muna imigunda yetu,

14 na ng'ombe wetu wapape mbahasha.

Sekekuwe na ng'hondo muna zimhongono zetu,

hebu wehi wetu sekewawanyang'hule wanhu,

na sekekuwe na chililo muna zinzila zetu.

15 Wamweda ng'hani wanhu wowatemeligwe mate fana ivo,

wamweda wanhu waja Mndewa Mulungu ni Mulungu wawo.