1 Nizakwimbila weye Mndewa Mulungu kwa ulondo wako wa kufunya umoyo,

nizagong'onda uwaminika wako kwa nyelesi zose siku zose.

2 Nilonga kuwa ulondo wako wa kufunya umoyo wizakala siku zose,

na uwaminika wako wizagendelela kuwoneka fana ulanga.

3 Kulonga, "Nitenda lagano na munhu yonimsagule,

nimulahila msang'hani wangu Daudi.

4 Nilonga, ‘Nizawagangamiza welesi wako siku zose,

iviya nizachigangamiza chigoda chako cha chifalume kwa nyelesi zose.’ "

5 Ulanga wizatogoza mauzauza yako, weye Mndewa Mulungu,

iviya wizatogoza uwaminika wako muna umting'hano wa vilumbe welile.

6 Vino yelihi uko kuulanga yodaha kulinganyizigwa na Mndewa Mulungu?

Yelihi muna ivilumbe va kuulanga yalingile fana Mndewa Mulungu?

7 Mulungu kodumbigwa muna umting'hano wa vilumbe welile,

kodumbigwa kufosa wose womzunguluka.

8 Mndewa Mulungu Wili na Udahi,

Weye Mndewa Mulungu, yelihi yeli na nguvu fana weye?

Uwaminika wako wokuzunguluka.

9 Weye kotawala bahali ili na beho kulu,

lusita mawimbi makulu voyokwiza koyemiza.

10 Kumuhonda Lahabu* kawa fana mtufi,

kuwapwililisa wehi wako kwa nguvu zako.

11 Ulanga wako na isi yako,

weye niiyo utendile vandusilo va zisi zose na chila chinhu chili umo.

12 Weye kulumba kasikazi na kusi,

mulima wa Taboli na mulima wa Helimoni yodeng'helela zina jako.

13 Mkono wako una nguvu,

mkono wako wa kulume ugangamala na uhuma.

14 Haki na kuhumiza voilondeka ni chandusilo cha chigoda chako cha chifalume,

ulondo na uwaminika vokulongolela.

15 Wamweda wanhu waja wovimanya kutenda chelekocheleko,

waja wogenda muna dibung'hulo jako, weye Mndewa Mulungu.

16 Wodeng'helela imisi kwa ichimu chako,

na wokutogoza kwa haki yako.

17 Koching'ha nguvu na udahi wa kuhuma,

kwa unovu wako mhalati zizakwinuligwa.

18 Ngao yetu ni yake Mndewa Mulungu,

mfalume wetu kalawa kumwako weye Mulungu welile wa Isilaili.

19 Umwaka kulonga muna zinzozi,

kuwalongela wasang'hani wako waminika,

"Nimwing'ha nguvu galu imwe,

nimwinula iyo yoyasaguligwe mwaiwawo.

20 Nimuwona Daudi msang'hani wangu,

nimuhaka mavuta yangu yelile muladi yawe mfalume.

21 Mkono wangu wizamtaza,

kweli mkono wangu wizamgangamiza.

22 Wehi hawezadaha kumvwizila,

Iviya wahasanyi hawezamdununza.

23 Niye nizawahonda wehi wake,

Nizawananga waja wowomwihila.

24 Uwaminika wangu na ulondo wa kufunya umoyo wizakuwa nayo,

kwa zina jangu mhalati yake izakwinuligwa.

25 Nougangamiza utawala wake,

kulawa bahali mbaka nyanda.

26 Yeye kezanilongela, ‘Weye niiyo tati yangu na Mulungu wangu,

niiyo mkalizi wangu yonilopola.’

27 Na nizamtenda yeye kuwa chaudele,

nizamtenda yawe mtawala mkulu kufosa wafalume wose.

28 Ulondo wangu wa kufunya umoyo wizakala siku zose,

na lagano jangu kumwake hadizabeneka siku zose.

29 Welesi wake wa chifalume nizaugangamiza siku zose,

na chigoda chake cha chifalume chizakala fana ulanga siku zose.

30 "Mbali one wanage wahayaleka mafundizo yangu,

na sekewazindilile ndagilizi zangu,

31 one hawayazindilila malagilizo yangu,

na kuleka kwamha chonilonga,

32 nizawatagusa uhasanyi wawo kwa balati,

nizawatowa kwa mahulo kwa ichimu cha mbuli zawo zihile.

33 Mbali sizasegeza ulondo wangu wa kufunya umoyo kumwake,

na nizagendelela kuwa mwaminika kwa lagano jangu.

34 Sizabena lagano jangu na weye,

sizagalula mbuli yangu inilongile.

35 Kwaviya niye yelile, niilaha na sizagalula,

kweli sizamulongela Daudi uvwizi.

36 Welesi wake wizakala siku zose,

na chigoda chake cha chifalume chizakala siku zose fana zuwa.

37 Chizakala siku zose fana mwezi,

msindila mwaminika yeli kuulanga."

38 Mbali sambi weye Mulungu kumwasa na kumulema,

kumuwonela ludoko munhu youmsagule.

39 Kudilema lagano doutendile na msang'hani wako,

na kuditenda kombelo jake jambule mwiko muna ditimbwisi.

40 Ng'huta zose za bululu jake kuzibomola,

na mhongono zake kuzibenabena.

41 Wafosanzila wose womuhoka vinhu vake,

kawa munhu wa kuzehigwa kwa wakaya wayage.

42 Kuwatenda wehi wake wahume,

na kuwadeng'heleza wose womwihila.

43 Viya vake va ng'hondo kuvitenda viwe vidugi,

na kumuleka yahumigwe kuing'hondo.

44 Kumvula ukulu wake wa chifalume,

na kuchigwisa chigoda chake cha chifalume.

45 Kuzihunguza siku za ubwanga wake,

na kumguma chinyala.

46 Weye Mndewa Mulungu, kwizaifisa mbaka zuwaki?

Vino ludoko lwako lwizagendelela kwaka fana moto?

47 Ukumbuke ugima wangu viwili mdodo,

kwaviya munhu youmulumbile kokala lusita luguhi.

48 Munhu yelihi yokala bila ya kudanganika?

Iviya yelihi youkombola ugima wake kwa nguvu ya leme?

49 Weye Mndewa, ulondo wako wa kufunya umoyo

woumulahile Daudi kwa uwaminika wako wakulihi?

50 Weye Mndewa Mulungu, ukumbuke viya vonidununzigwa niye msang'hani wako,

viya vonidununzigwa na wanhu wa zisi zimwenga.

51 Lola viwomdununza mfalume wako youmsagule,

viya viwonidununza chila honihita.

52 Mndewa Mulungu yatogolwe siku zose,

Ivo na Ivo.