1 Nokimbilila kwa Mndewa Mulungu kukala goya.

Lelo modahaze kunilongela,

"Guluka fana ndege mbaka kuna umulima.

2 Kwaviya wanhu wotenda mbuli zihile wokwega mhinde zawo,

wamala kusasala misale muna diziza,

muladi wawapigisile wanhu wotenda mbuli zinogile.

3 Vandusilo va malagilizo vihanangigwa,

munhu yanogile kezatenda choni?"

4 Mndewa Mulungu kamuna ikaye yake yelile,

chigoda cha chifalume cha Mndewa Mulungu cha kuulanga.

Kowalola wanhu,

kovimanya chila chinhu chowotenda.

5 Mndewa Mulungu kowageza wanhu wotenda mbuli zinogile,

mbali kowehila wanhu wotenda mbuli zihile,

kowehila wanhu weli na mizoyo itoboke.

6 Kezawatowa wanhu wotenda mbuli zihile kwa makala ya moto na mabwe ya baluti,

na beho kulu dizakuwa iyo nhaguso yawo.

7 Kwaviya Mndewa Mulungu kotenda mbuli zigoloke chila lusita,

kolonda sang'hano zigoloke,

wanhu wotenda mbuli zigoloke wezachiwona chihanga chake.