1 Weye Mndewa Mulungu unilopole kulawa kwa wanhu wotenda mbuli zihile,

unikalize kulawa kwa wanhu wasede.

2 Wogesa mbuli zihile muna imizoyo yawo,

na wokong'hela ng'hondo chila siku.

3 Mbuli zawo zolumiza fana sungu ya zoka,

muna imilomo yawo molawa mbuli zikoma fana muyombo.

4 Weye Mndewa Mulungu, unikalize kulawa muna yamakono ya wanhu wotenda mbuli zihile,

unikalize na wanhu wasede,

unikalize na waja wogesa kunyagiza.

5 Weli na magoda wanifisila mtego muladi nyenzeke,

wakunzula nzabi za lwavu lwawo,

watega mitego kuna inzila yangu.

6 Nomulongela Mndewa Mulungu, "Weye ni Mulungu wangu."

Weye Mndewa Mulungu, uhulike vonikupula uniwonele ubazi.

7 Weye Mndewa Mulungu ni mkombola wangu mwene nguvu,

wounikaliza ditwi jangu lusita lwa ng'hondo.

8 Weye Mndewa Mulungu sekeuweng'he wanhu wotenda mbuli zihile chiya chowolonda,

sekeuleke wapate chowoilunga muladi sekewaigode.

9 Sekeuwaleke wehi wangu wanihume,

magayo yogaligwa na milomo yawo yawabwelele.

10 Makala ya mabwe ya moto yawagwile,

na wasigwe muna umoto,

wasigwe muna yamakombo muladi sekewadahe kuibanga.

11 Wavwizi sekewapate chowolonda muna iisi,

mbuli zihile ziwapelembe himahima wanhu wasede.

12 Novimanya kuwa Mndewa Mulungu kowatenda ngayengaye wahume,

na kowagombela wanhu wose wogaya.

13 Kweli wanhu wotenda voilondeka wezaditogoza zina jako,

na wanhu wotenda mbuli zinogile wezakala haulongozi hako.