1 Weye Mulungu, moyo wangu haudumba chinhu,

nizakwimba wila wa nhogolwa kwa moyo wangu wose.

2 Nizalamka kuno notowa bango na chinubi,

nizalamka chilochilo kwa wila wangu.

3 Weye Mndewa Mulungu nizakwing'ha hewela hagati ya wanhu wose,

nizakwimbila nhogolwa hagati ya wanhu wa zisi zose.

4 Kwaviya ulondo wako wa kufunya umoyo umema mbaka kuulanga,

na uwaminika wako umema mbaka kuna yamawingu.

5 Utogozigwe weye Mulungu uli kuchanyha kuulanga!

Ukulu wako wenele chila hanhu.

6 Unikombole na unitaze kwa mkono wako wa kulume,

muladi wanhu wouwalonda walopoligwe.

7 Mulungu kalonga kulawa hanhu hake helile,

"Kwa deng'ho na uhumi, nizaigola isi ya Shekemu,

nizadilinga bawe da Sukosi.

8 Isi ya Gileadi ni yangu na isi ya Manase ni yangu,

isi ya Efulaimu ni kingilo da ditwi jangu,

na isi ya Yuda ni fimbo yangu ya utawala.

9 Isi ya Moabu yonisang'hanila fana ziga da kunawila,

nizayasila isi ya Edomu chilatu changu kulagusa ni yangu,

nodeng'helela kupotigwa kwa Filisiti."

10 Yelihi yondayanigale kuna dibululu dili na mhongono?

Yelihi yondayanilongoze mbaka Edomu?

11 Vino weye Mulungu huchilemile?

Huhita kaidi na watowang'hondo wetu.

12 Uchitaze chihaitowa na wehi wetu,

kwaviya kutazigwa na wanhu hakufaya chinhu.

13 Mulungu yahawa na cheye, chizahuma,

na kezawahonda wehi wetu.