1 Weye Mdimi wa Isilaili chitegeleze,

weye uulongoze welesi wa Yosefu fana bumbila da ng'hondolo,

weye ukala uchanyha ya makelubi, ulave bung'hulo jako.

2 Haulongozi wa makabila ya Efulaimu na Benyamini na Manase,

ulaguse udahi wako,

wize uchilopole.

3 Uchibweleze kumwako weye Mulungu.

Uchilole kwa unovu wako,

muladi chikomboligwe.

4 Weye Mndewa Mulungu Wili na Udahi,

kwizawonela ludoko chiwopula wanhu wako mbaka zuwaki?

5 Kuwalisa masozi fana ndiya,

na kuweng'ha hamha dimemile masozi wang'we.

6 Kuchitenda chiwe chimu cha ndwagi kwa wakaya wayetu,

na wehi wetu wochiseka.

7 Weye Mulungu Wili na udahi, uchibweleze kumwako,

uchimwemwesele chihanga chako na unovu wako,

muladi chikomboligwe.

8 Kuwalava wasaho zetu muna iisi ya Misili fana munhu viyong'ola mzabibu,

kuwawinga wanhu wa zisi zimwenga,

na kuuhanda muna iisi yawo.

9 Kusasala mgunda kwa ichimu chake,

mizizi igangamala imemeza isi.

10 Milima igubikigwa kwa sisila da mzabibu uja,

matambi yake yagubika mibiki ya mielezi ya Mulungu.

11 Matambi yake yenela mbaka mwiibahali,

mazugwana yake yenela mbaka muna ulwanda.

12 Habali kubomola ng'huta za mgunda,

muladi wose wofosa habehi wahe matunda yake?

13 Nguluwe woubojoga,

na wanyama wa mbago woja umo.

14 Chibwelele, weye Mulungu Wili na Udahi.

Ulole hasi kulawa kuulanga uwone,

ulole mzabibu uno,

15 mzabibu wouhandigwe kwa mkono wako wa kulume,

na zugwana diya douditendile dikule.

16 Mzabibu wako ukanhigwa na usomigwa moto,

vouwakalikila wanhu wako wonangigwa.

17 Umtaze yoyokala mkono wako wa kulume,

umtaze munhu youmgangamize kwa ichimu chako.

18 Maabaho hachizakuleka,

uching'he ugima na cheye chizaditambikila zina jako.

19 Weye Mndewa Mulungu Wili na udahi, uchibweleze kumwako,

uchimwemwesele chihanga chako na unovu wako, muladi chikomboligwe.