1 Mndewa Mulungu, nokulamba unitegeleze na unidike,

kwaviya niye ngayengaye na nyondenyonde.

2 Ukalize ugima wangu, kwaviya niye mwaminika kumwako,

weye Mulungu wangu,

mkombole msang'hani wako yokuhuwila.

3 Mndewa Mulungu, uniwonele ubazi,

kwaviya nikulamba weye siku yose.

4 Udeng'heleze moyo wa msang'hani wako,

Kwaviya nokwinulila moyo wangu, weye Mndewa Mulungu.

5 Kwaviya weye Mndewa Mulungu kunoga na kolekelela uhasanyi,

kowalonda wanhu wose wokupula.

6 Weye Mndewa Mulungu, tegeleza mbuli yonipula,

tegeleza vonipula uniwonele ubazi.

7 Nizakupula siku ya magayo yangu,

kwaviya kwizanidika.

8 Weye Mndewa Mulungu, habule fana weye hagati ya milungu ya isi,

habule sang'hano fana sang'hano zako.

9 Wanhu wa zisi zose wouwalumbile wezakwiza,

wezakutambikila weye Mndewa Mulungu,

wezaditogoza zina jako.

10 Kwaviya weye niiyo mkulu na kotenda mauzauza,

weye niiyo Mulungu wiidumwe.

11 Weye Mndewa Mulungu, unifunze nzila yako,

muladi nidahe kugenda muna ikweli yako,

moyo wangu udidumbe zina jako.

12 Weye Mndewa, Mulungu wangu, nizakwing'ha hewela kwa moyo wangu wose,

nizaditogoza zina jako siku zose.

13 Kwaviya konilonda ng'hani,

kunikombola kulawa kuzimu.

14 Weye Mulungu, weli na magoda wonitowa,

bumbila da wasede wonisepa muladi wanikome,

na hawakusondelela.

15 Mbali weye Mndewa Mulungu, Mulungu wa unovu na ubazi,

hupata ludoko himahima, mbali kumema ulondo na uwaminika.

16 Unihindukile na uniwonele ubazi,

uning'he nguvu yako, niye msang'hani wako,

umkombole mwana wa msang'hani wako wa chike.

17 Unilaguse chilaguso cha unovu wako,

muladi wanhu wonihila wawone na wagwe chinyala

kwaviya weye Mndewa Mulungu, kunitaza na kuniguma moyo.