1 Mulungu, tegeleza vonilongelela,

ukalize ugima wangu na ukimilile chowailungila wehi wangu.

2 Unike kutali na malungilo yafisike ya wanhu wotenda mbuli zihile,

na unifise kutali na tibwilitibwili za wabananzi.

3 Mbuli zawo zokanha fana mapanga yokutwa,

na mbuli zawo za usede zohoma fana misale.

4 Maabaho kulawa hanhu howaifisile, womtowa munhu yelibule ubananzi,

womtowa kwa kusinhukila bila kudumba.

5 Waigangamiza muna zimbuli zihile,

waitogolela hanhu ha kufisa mitego yawo.

Wolonga, "Yelihi yondayaiwone?

6 Wailunga kuwatendela wanhu usede.

Wagesa mbuli iwailungile izalawilila."

Ukweli lungilo da moyo wa munhu hadimanyika.

7 Mbali Mulungu kezawapigisila misale yake,

wezalumizigwa kwa kusinhukila.

8 Wezanangigwa kwa chiya chiwalongile,

wanhu wose wondawawawone wezatingisa matwi.

9 Maabaho wanhu wose wezadumba,

wezaigong'onda sang'hano ya Mulungu,

na kuzigesa sang'hano zake.

10 Wanhu wotenda mbuli zinogile wezamdeng'helela Mndewa Mulungu na kumkimbilila.

Wose weli na moyo unogile wezamtogoza yeye!