1 Mulandulileni dizi Mulungu wetu kwa kumwimbila nyila za deng'ho,

mtoweleni ng'henze Mulungu wa Yakobo!

2 Yanduseni wila kwa kutowa ngoma,

bango dilila vinogile na chinubi.

3 Toweni mhalati za mhembe za mabebelu ya ng'hondolo,

lusita lwa kwima kwa mwezi,

na lusita lwa mwezi ukangale niiyo siku ya dugila jetu.

4 Ijo ni lagilizo kwa wanhu wa Isilaili,

malagilizo ya Mulungu wa Yakobo.

5 Kaweng'ha wanhu wa Isilaili lagilizo

lusita viyawatowile wanhu wa Misili.

Nihulika ulonzi siumanyile, wolonga,

6 "Nimnenulani mbahasha muna yamayega yenu,

nimuhokani chigelo chimwamhile muna yamakono.

7 Viukalile muna yamanhesa kunitanga na nikulopola.

Nikwidika kulawa kuna yamawingu matitu yeli na mbumo,

nikugeza muna zinzasa za Meliba.

8 Mweye wanhu wangu, tegelezeni, nomzumani,

nolonda mweye Waisilaili munitegeleze!

9 Sekemuwe na mulungu imwenga,

sekemumtambikile mulungu wa isi imwenga.

10 Niye niiyo Mndewa Mulungu, Mulungu wenu,

yonimulavileni kuna iisi ya Misili,

hameni milomo yenu, nizamulisani.

11 "Mbali wanhu wangu hawanitegeleze,

Isilaili hawalondile kunisondelela.

12 Ivo niwaleka wasondelele mizoyo yawo midala,

wasondelele magesa yawo wenyewo.

13 "Wanhu wangu one wahanitegeleze,

na Isilaili wahasondelele nzila zangu,

14 nahawahumile wehi wawo himahima,

na kuhindula mkono wangu kusonhela wehi wawo.

15 Waja wonihila niye Mndewa Mulungu, wahaidulika kwa ludumbo haulongozi wangu,

wagendelele kutenda ivo siku zose.

16 Mbali mweye nihawalisile ngano inogile,

nihawegutize kwa uki wa kumbago."