1 Weye moyo wangu umtogoze Mndewa Mulungu.

Weye Mndewa Mulungu kwa mkulu ng'hani,

kuvala hishima na ukulu fana mawalo.

2 Kuivaza bung'hulo fana walo,

kwanzanza ulanga fana hema.

3 Kuzenga mhanda za kaye yako uchanyha ya mazi ya kuulanga,

kuyatenda mawingu kuwa tololi jako,

kuguluka uchanyha ya mabawa ya beho.

4 Kutenda beho kuwa wasenga wako,

na kutenda milambi ya moto kuwa wasang'hani wako.

5 Kuika isi muna ivandusilo vako,

haizatingisika ng'o.

6 Kuigubika isi kwa bahali fana viya walo,

mazi yema uchanyha ya milima.

7 Mbali uhalagiliza mazi yokimbila,

uhabuma mazi yohalawa.

8 Milima ima zugaga,

makolongo yalawilila,

hanhu haulondile.

9 Kuyekila mhaka mazi sekeyaloke,

na sekeyaigubike isi kaidi.

10 Kotenda nzasa zitile mazi mengi muna yamakolongo,

mazi yokilima hagati ya milima.

11 Nzasa ziya zoweng'ha mazi wanyama wa kumbago,

mhunda wa kumbago wokanha ng'hilu zawo.

12 Ndege wa kuulanga wozenga visanza vawo mumgwazogwazo ya mazi,

wokwimba muna yamatambi.

13 Koitonyela milima kulawa kuchanyha hanhu houkala,

na koitemela mate isi iwe na mavuno ng'hani.

14 Kokoteza mgina kwa ichimu cha ng'ombe,

kokoteza mboga kwa ichimu cha wanhu,

muladi wapate ndiya kulawa muna iisi.

15 Iviya wapate divai iudeng'heleze moyo wawo,

wapate mavuta ya zaituni ya kubung'hula chihanga,

na wapate gate da kuguma nguvu muna ulukuli.

16 Mibiki ya Mndewa Mulungu yopata mazi ya kufaya,

mielezi ya Lebanoni iyahandile, yokwitililigwa mazi.

17 Umo ndege wozenga visanza vawo,

mahondohondo wana mbane.

18 Milima mitali ni ukazi wa luti wa kumbago,

na miluwe ni hanhu howokimbilila nyegele.

19 Katenda mwezi muladi kuchikila lusita,

zuwa najo divimanya lusita lwa kuswa.

20 Weye kogala ziza, yokuwa ichilo,

wanyama wose wa kumbago wozunguluka.

21 Simba wotongoloma muladi wapate ndiya,

wozahila ndiya yawo kulawa kwa Mulungu.

22 Zuwa dahalawa wohita kumwawo,

na wobwela kugona muna yamatuka yawo.

23 Maabaho wanhu wohita kuna zisang'hano zawo,

wohita kusang'hana usang'hano mbaka ichigulogulo.

24 Weye Mndewa Mulungu kusang'hana mbuli nyingi ng'hani.

Zose kuzitenda kwa ubala,

isi imema vilumbe vako.

25 Kuna bahali ng'hulu na ngalamu,

kumema vilumbe havipeteka bule,

vilumbe vigima, vikulu na vidododo.

26 Meli zofosa umo,

muna ibahali iyo kokala Lewiasani yalumbigwe yangale umo.

27 Vilumbe wawo wose wokuhuwila weye,

uweng'he ndiya yawo kwa lusita lwake.

28 Weye koweng'ha ndiya,

na wawo woidondola.

Weye koufungula mkono wako,

na wawo wokwiguta vinhu vinogile.

29 Viufisa chihanga chako, wodumba.

Viusegeza muhe wawo, wodanganika,

na wobwela muna yamatimbwisi kuwalawile.

30 Uhawahuvila muhe wako, wawo wolumbigwa,

na koitenda isi iwe na ulongo unogile.

31 Ukulu wa Mndewa Mulungu ukale siku zose,

Mndewa Mulungu yadeng'helele sang'hano zake mwenyewo.

32 Koilola isi nayo yogudemeka,

koidalisa milima nayo yolava yosi.

33 Nizamwimbila Mndewa Mulungu siku zose za ugima wangu,

nizamtogola Mulungu wangu lusita lwose lonikala.

34 Weye Mndewa Mulungu, unogelwe na magesa yangu yano,

kwaviya nokudeng'helela weye Mndewa Mulungu.

35 Wahasanyi wanangigwe muna iisi,

na wanhu wotenda mbuli zihile sekewawe uko kaidi.

Weye moyo wangu umtogoze Mndewa Mulungu.

Mndewa Mulungu yatogolwe.