1 Vinoga kumtogoza Mndewa Mulungu,

na kwimba wila wa kuditogoza zina jako, weye Mndewa Mulungu Wili Uchanyha Ng'hani.

2 Vinoga kugong'onda ulondo wako imitondo,

na uwaminika wako ichilo,

3 kwa chia cha nyila chili na singija longo,

kwa ulilaji wa bango.

4 Kwaviya weye Mndewa Mulungu, kutenda nideng'helele sang'hano zako,

nizakwimba kwa deng'ho kwa ichimu cha sang'hano zako zoutendile.

5 Sang'hano zako weye Mndewa Mulungu ng'hulu ng'hani,

habule munhu yovimanya mbuli ziugesa.

6 Wabozi hawadaha kuzimanya,

mambunye hawazimanya mbuli izo.

7 Wanhu wotenda mbuli zihile wosuka fana mayani,

na wotenda ubananzi wokwalika fana maluwa,

mbali uhelelo wawo ni kunangigwa.

8 Mbali weye Mndewa Mulungu,

kotawala siku zose.

9 Kwaviya kweli wehi wako weye Mndewa Mulungu wezakwaga,

na wose wotenda mbuli zihile wezaimwaga.

10 Konitenda niwe na nguvu fana lume da ng'ombe mbago,

na kunitemela mate.

11 Meso yangu yawona wehi wangu viwohumigwa,

magutwi yangu yahulika magayo ya wanhu wose wotenda mbuli zihile.

12 Wanhu wotenda mbuli zinogile wezakula fana mivumo itelele,

wezakuwa fana migude ya Lebanoni.

13 Fana mibiki ihandigwe muna ikaye ya Mndewa Mulungu,

yokula goya muna uluhelengo lwa Mulungu wetu.

14 Wanhu wano wezakwima matunda mbaka kuulala,

wezakuwa na ubisi na mayani mengi.

15 Wagong'onde kuwa Mndewa Mulungu kohumiza voilondeka,

yeye luwe wangu,

kabule wihi.