1 Mndewa Mulungu yatogolwe!

Nizamwing'ha hewela Mndewa Mulungu kwa moyo wangu wose,

hagati ha wanhu wengi wotenda mbuli zinogile.

2 Sang'hano za Mndewa Mulungu ni ng'hulu ng'hani,

wanhu wose wonogelwa nazo wozigelegeza.

3 Chila chiyotenda china hishima na ukulu,

unovu wake wokala siku zose.

4 Katenda sang'hano zake za mauzauza zikumbukigwe,

Mndewa Mulungu kanoga na kana ubazi.

5 Koweng'ha ndiya wawo wowomdumba,

kezakumbuka lagano jake siku zose.

6 Kawalagusa wanhu wake nguvu za sang'hano zake,

na kaweng'ha zisi za wanhu wamwenga ziwe uhazi wawo.

7 Sang'hano zake zigoloka na zokwaminika,

malagilizo yake yose ni ya kuhuwiligwa.

8 Malagilizo yake yakale siku zose,

yatendeke kwa uwaminika na voilondeka.

9 Kawakombola wanhu wake,

kaweng'ha lagano jake diwe da siku zose.

Zina jake jela na da kudumbiza.

10 Uhalonda ubala wanduse kwa kumdumba Mndewa Mulungu,

wose wozindilila malagilizo yake wana umanyi.

Nhogolwa zake zokala siku zose.