1 Zumbe Mnungu nii wakimala hale?

Nii wakefisa mwo lupisi lwa makunt'ho?

2 Wakiwa wasulumizwa kwa kitugu cha wata wavu,

waihi watega lwinika wawagwile wakiwa.

3 Mwiihi aketunya kwa kumunk'hwamunk'wa kwakwe kwiihile,

mhank'hu aligita na kumlemela Zumbe Mnungu.

4 Mwo kitugu chakwe mnt'hu mta wavu, hakumvika Mnungu,

zifanyanyi zakwe ni kugamba Mnungu haanitende dyodyose.

5 Sila za mnt'hu mta wavu zina upati,

usengelo wa Mnungu wihale ne zifanyanyi zakwe,

naho awabela wank'hondo wakwe wose.

6 Afanyanya akagamba, "Hikogoha,

henipate makunt'ho mazuwa yangu yose."

7 Mnomo wawe umema maligito na udant'hi na kutisa,

lulimi lwake lwalonga mbuli ziihile.

8 Akefisa mwe zikaya uku akalota kugamba,

amkoma mnt'hu heena masa,

emeso kwa kumnyatila msokezi.

9 Ongola mwe vituka enga simba,

Awanyatila wakiwa,

awagwile mwo lwinika wakwe.

10 Wasokezi wakump'hukilwa na kukinywa hasi,

wagwilwa kwa ukwank'walu wa mnt'hu aihile.

11 Mta wavu afanyanya mwo moyo wakwe akagamba,

"Mnungu kajala,

kafisa kihanga chakwe hakuona kint'hu!"

12 Inuka Zumbe Mnungu, uwasengele,

usekuwajala wakuhujilwa!

13 Vadahika vivihi mwiihi ambele Mnungu,

akakegamba mwenye, "Haanitange kwo usengelo"?

14 Mna weye wayaona makunt'ho ya wakiwa,

naho mazuwa yose wawambiza.

Heina kint'hu akuhuwila weye.

Weye kunda mwambizi ywa wanank'hiwa.

15 Ubanange ludole lwa mnt'hu aihile,

uheleze wavu wakwe wose usekuutenda naho.

16 Zumbe Mnungu ni Seuta ywa mazuwa yose,

wose wakuvika milungu mituhu,

nawahauswe mwe isi yakwe.

17 Zumbe Mnungu kuyamanya makawiilo ya heweina wambizi,

wawenk'ha mhuwi naho waitegeleza indilo yawe,

18 wawagombela wanank'hiwa na wakuhujilwa,

vileke want'hu walaile mwo ulongo wasekudaha kwigala wogofi naho.