1 We Mnungu, want'hu watakwiza waikump'hukila isi yako,

waigela usavu Nyumba yako ikukile

waitenda Yelusalemu kunda hame.

2 Vimba va wandima wako, waink'hiza idigwe ni madege ulanga,

vimba vawe va want'hu wako vinda nk'hande ya makala mbago.

3 Wetila sakame ya want'hu wako enga mazi,

itilwa enga mazi mwe Yelusalemu yose,

naho hahali yeyose ywa kuwamosela msanga awo wabanike.

4 Kinda kint'hu cha soni mwe si zimgihi na suwe,

wakiseka na kukitendela lubezo.

5 Zumbe noukifiile maya mazuwa yose?

Maya yako nayagendeele kukweela enga moto?

6 Wakuuile maya yako kwa si heziikukuvika weye,

kwa want'hu hewekulombeza zina dyako,

7 kwaviya wawakoma want'hu wako,

naho wabananga pele zikaya zawe.

8 Usekukisulumiza kwo wavu wa wakale wetu.

Usunguze kukionela mbazi,

kwaviya chaza kawiilo.

9 Uchambize weye Mnungu mkombola ywetu

kiyokole na kukiusila wavu wetu,

kwajili ye nt'hogola yako weye mwenye.

10 Nii want'hu wa si nt'huhu wakiuze kugamba,

"Ekuhi Mnungu ywenyu?"

Ukilagise ivo ukuwalihiza want'hu wa si nt'huhu,

wakomi wa wandima wako.

11 Uitegeleze indilo ya wavugailwa,

uwaike ulekelwa awo wasengelwe kukomwa.

12 Uwalihize nk'hanana mfugate awo wa hagihi na suwe,

awo wakubeile weye Zumbe.

13 Naswe want'hu wako, zingoto za madimilo yako,

nekikutogole,

na kukutunya lupisi lwose lukwiza.