1 Usekupata makunt'ho kwajili ya waihi,

usekuwaonela finju wakudamanya yaihile.

2 Kwaviya awo nawasunguze kubanangwa pele,

nawanyale enga mabwali mateke.

3 Mhuwile Zumbe Mnungu na kudamanya ayedi,

vileke wikale mwe isi na kunda na utondowazi.

4 Uzungule kinyemi chako kwa Zumbe Mnungu,

yehe naye naakwink'he yadya ukuyaunga mwo moyo wako.

5 Mwink'he Zumbe Mnungu wikazi wako,

mhuwile yehe naye naakwambize.

6 Naautende uwedi wako unde enga ung'azi,

uwagilwa wako enga zuwa dya nomsi.

7 Ikala ha Zumbe Mnungu naho umgoje kwa kufinyiliza.

Usekupata kiyangayanga kwa wadya wakupata,

want'hu wakupata mwe mizungu yawe ihile.

8 Usekunda na maya hegu kuihiwa,

kwaviya ayo yongezela uwihi.

9 Want'hu wakudamanya yaihile nawabanangwe,

mna kwa wadya wakumvika Zumbe Mnungu nawande wakipe mwe isi.

10 Kwaviya hakei ludodo mwiihi naabanangwe,

hata mkamzungula homumuone.

11 Mna wakukeseleza naweikaile isi

naho nawekale kwa utondowazi.

12 Mwiihi amwiihiya mnt'hu ywedi,

na kumtendela uwihi,

13 mna Zumbe Mnungu amseka mwiihi,

kwaviya kamanya uheelo wakwe wi hagihi.

14 Want'hu wavu waguha jambia na nyuta zawe,

wakaunga wawakome want'hu wakiwa naho heweena kint'hu,

wawachinje wakwikala kwa kutimila malagizo ya Mnungu,

15 mna sime zawe neziwakome woho wenye,

naho nyuta zawe nezivunwe.

16 Ni vedi ugoli mgeke wa mnt'hu ywedi,

kujink'ha ugoli ubindile wingi wa want'hu wavu,

17 kwaviya udahi wa want'hu wavu noubanangwe,

mna Zumbe Mnungu awamila want'hu wata uwedi.

18 Zumbe Mnungu amila wikazi wa want'hu wahuwilwa,

ukipe wawe nawo noukale mazuwa yose.

19 Hawaone makunt'ho yakabula mazuwa ya yaihile,

mazuwa ya gumbo nawande na nk'hande zimemile.

20 Mna waihile nawabanangwe,

wank'hondo wa Mnungu nawanyale enga mabwali ya kwe mbago, kwaviya nawahauke enga mosi.

21 Mnt'hu mwavu aguha cha mnt'hu haheina kuvuza,

mna mnt'hu ywedi alava kwa ukise.

22 Wavikilwe ni Zumbe Mnungu nawande wakipe mwe isi,

mna waligitwe ni Mnungu nawabanangwe pele.

23 Sila za mnt'hu ywedi Zumbe Mnungu azilongoza,

naho amwamila yudya akumwelela,

24 hata anakobadika haagwe hasi,

kwaviya Zumbe Mnungu amwinula.

25 Nehinda mbwanga haluse ni mdala,

hyaonaga mnt'hu ywedi alekigwe ni Mnungu,

hegu wana wawe wakalombeza lombeza nk'hande.

26 Mazuwa yose awenk'ha watuhu kwa kinyemi na kuwakopesha,

wanawe nawo ni uvikilwa.

27 Lekana na wiihi, udamanye uwedi,

weye nawe nowikale mwe isi mazuwa yose.

28 Kwaviya Zumbe Mnungu aunga uwagilwa,

naho hakuwaleka wahuwilwa,

awamila awo mazuwa yose,

mna welekwa wa waihi noubanangwe.

29 Want'hu wedi nawande wakipe mwe isi,

naho nawekale uumwo mazuwa yose.

30 Mnomo wa mta uwagilwa alonga mbuli za umanyi,

kwa lulimi lwakwe alonga ya kindedi.

31 Aizumila sigilizi ya Mnungu ywakwe,

yehe naye hakuzembeduka mwo lugendo lwakwe.

32 Mnt'hu mwiihi amnyatila mnt'hu ywedi

na kugeza kumkoma,

33 mna Zumbe Mnungu hamleke mnt'hu ywedi mwo udahi wa mnt'hu aihile.

hegu kumwasa asezengwe na alongelezwe haheina lema.

34 Mhuwile Zumbe Mnungu na kutoza sigilizi zakwe,

yehe naye naakuvikile uikaile isi,

na kuona waihi wakabanangwa.

35 Nehimuona mnt'hu aihise,

akekwezaga kulanga enga miti ya mielezi ya Lebanoni,

36 akajika aho nombokaga aho naho hyambwiilaga,

namzungulaga mna haonekaga naho,

37 Mkaule mnt'hu ywedi naho mhuwilwa,

mnt'hu akuungisa utondowazi naande na cheleko,

38 mna waihi wose nawabanangwe,

welekwa wawe nawo nawasile pele.

39 Zumbe Mnungu awayokola want'hu wedi,

naho awamila mwo lupisi lwa makunt'ho.

40 Zumbe Mnungu awambiza na kuwayokola,

awayokola mwa want'hu waihile na kuwakombola,

kwaviya wagulukila utondowazi kwakwe.