1 We Mnungu, mhinize seuta asengele kwa uwagilwa,

mwana kiseuta haeina kwazagula.

2 Awalamule want'hu wako kwa uwagilwa,

na wakiwa wako haheina kuwahujila.

3 Milima yeleke upati kwa want'hu wako,

vigulu navo viuone uwagilwa.

4 Naawagombele wakulumizwa kasidi,

na kuwayokola wakiwa,

na kuwabananga haweina lema.

5 Seuta ekale wikazi mtali enga zuwa naho enga mwezi,

vyeleko vose.

6 Seuta ande enga fula ikunya mwe nk'honde ihumunt'we,

enga manyunyu yakunyunya mwe isi.

7 Mwa mazuwa yo useuta wakwe uwagilwa ugendeele vedi,

upati nounde aho mpaka umwo mnenge nouheele .

8 Useuta wakwe ni kulawa bahali mpaka bahali,

kulawa kwo mto Eufulate mpaka kwo uheelo we isi.

9 Makabila ya kwe dijangwa nawenamize mitwi yawe hasi aho eli,

wank'hondo wakwe nawagwe wenye hasi.

10 Maseuta wa Talashishi na wa mp'wani ya hale wamwigaile kodi,

maseuta wa Sheba na Seba wamwigaile mageleko.

11 Maseuta wose wenamize mitwi yawe hasi hakwe,

want'hu wa si yose wamdamanyile ndima.

12 Kwaviya naawaonele mbazi wakiwa

na wadya wahujilwe haweina kint'hu naho heweina wambizi.

13 Awaonela mbazi haweina kint'hu na wakiwa,

wakiwa awahonya kulawa mwe file.

14 Awayokola kulawa mwo kulumizwa haheina lema na ukwank'walu,

ugima wawe kwakwe ni kint'hu chedi.

15 Seuta ekale wikazi mtali,

ahokele mageleko ya zahabu kulawa Sheba,

want'hu wamlombezele kwa Mnungu,

naho wamvikile mazuwa yose.

16 Isi indilise na ulozo,

vigulu vimeme nk'hande enga ya Lebanoni,

na want'hu mwe mizi enga mani yatimile.

17 Zina dyakwe dikale mazuwa yose

dyenele enga zuwa,

want'hu wose wamlombeze Mnungu na kumwitanga mvikilwa.

18 Atunywe Zumbe Mnungu, Mnungu ywa Izilaeli,

ni yehe ekedu akudamanya mbuli za kweheela.

19 Utunyeni ung'azi wakwe utendese we dizina dyakwe mazuwa yose!

Ukulu wakwe wiimemeze isi.

Taile! Taile!

20 Uno nuwo uheelo wo kulombeza kwa Daudi mwana Yese.