1 Weye Mnungu uniyokole mwa wank'hondo wangu,

unamile mwa awo wakunikump'hukila.

2 Uniyokole kulawa mwa want'hu wakutenda wiihi,

unikombole mwa wakomi awo.

3 Hata haluse wanongola vileke wanikome,

makwank'walu yaihile waniikila mizungu iihile miye.

Zumbe, miye hina wiihi wowose hegu wavu niwatendele.

4 Zumbe miye hiwabanange dyodyose, woho wakeika lumwe wanikump'hukile,

inuka unambize uone ivi nikailwe vihile.

5 Winuke weye Zumbe Mnungu ywa wose weye Mnungu ywa Izilaeli,

kimala uwatowe want'hu wa isi zose,

usekunda na mbazi kwa awo wakuika mizungu ya uwihi.

6 Kila kisingi umwo wakauya

wabuma enga makuli waka uzunguluka zunguluka umzi.

7 Tegeleza icho kikulawa mwe milomo yawe,

milosi yawe yasenga enga sime inoligwe,

wenye waona enga hawakwivika.

8 Mna weye Zumbe Mnungu uwaseke,

uwatendele lubezo want'hu wa si zose.

9 Weye ludole lwangu, nakukawiila weye.

kwaiya weye Zumbe Mnungu, niwe digomela dyangu.

10 Mnungu ywangu neeze kwangu kwa lukunde lwakwe,

yehe naanilagise wank'hondo wangu wahumigwe.

11 Mna, Zumbe weye niwe nk'hindo yetu, use kuwakoma kwaviya want'hu wangu nawajale.

Wangadise kwa ludole lwako na kuwa seleza hasi.

12 Wavu umwe milomo yawe, yose wakulonga ni wavu du,

wagwilwe kwa wefenyi wawe,

kwajili ya maligito yawe no udant'hi wawe,

13 wakome wose kwa maya yako,

uwakome pele wose,

niho nawamanye kugamba Mnungu niye Zumbe mwe Izilaeli,

hata na mwe ziisi zose.

14 Wank'hondo wangu wakauya nekisingi

wabuma enga makuli wakauzunguluka umzi,

15 wangadika wakazungula cho kudya,

naho hawanapatile wabuma enga makuli kilo chose.

16 Mna miye nenikeme hatunya ludole lwako,

nohutunye mtondo kwajili yo lukunde lwako,

weye kunda unyilikilo wangu

gomela dyangu heziilwa ni makunt'ho.

17 Weye wili ludole lwangu, nenikeme hakutunya,

weye Mnungu niwe digomela dyangu,

Mnungu ukuniungisa.