1 Atogolwe Zumbe Mnungu eli nyilikilo wangu,

akunihiniza kutowana mwe nk'humbizi,

na kuniikila lumwe kwa nk'hondo.

2 Yehe ni Mnungu ywangu ywo lukunde na gomela dyangu,

gomela dyangu naho myokozi ywangu,

nk'hindilo yangu iyo humyilikila

akuwaika want'hu wa si mwo udahi wangu.

3 Zumbe Mnungu, ivi mnt'hu ni kint'hu chani vikuleka umkaulise,

katendesai vikuleka umfanyanye?

4 Yehe ni enga muye,

mazuwa yakwe ni enga kizuli kikomboka.

5 Zumbe Mnungu, zipange zimbingu zako useele uku,

ikwafe milima vileke ilave mosi.

6 Igala lumwemwe na lukuwa uwa mwaganise wank'hondo,

walase ne misale yako uwakulumbuze.

7 Chulula mikono yako kulawa kulanga

nilave mwa mazi matali uniyokole,

nihonye mwe mikono ya watakwiza,

8 wata milomo ikudant'ha

ne mikono yawe ya kulume ina nk'huluta.

9 Nohukemele wila mhya Mnungu ywangu,

nenikeme hatowa zeze dya nyuzi mlongo,

10 ni kwa yehe akuwenk'ha uhumi maseuta,

uyo amuyokole mndima ywakwe Daudi kwa sime ikutwa.

11 Nikombole miye

uniyokole mwo udahi wa watakwiza,

wata kulonga lulimi,

mikono yawe nayo ya kulume yakuluta.

12 Niho wana wetu mwo ubwanga wawe,

nawande enga vihandwa vileligwe vedi

wana wetu wa kike nawande enga mikola ikizigwe mahambo,

ihambe dizumba dye kiseuta.

13 Magulu yetu nayameme

ulozo wi hengi,

ngoto zetu nazo nezeleke milongo ya maalufu.

14 Mifugwa yetu neidamane na kunda ludole,

heilave nda naho neyeleke kwa lupisi lukint'hile,

hokunde na kutahigwa hegu ndilo za makunt'ho mwe zisila zetu.

15 Wana kinyemi want'hu wa ivo,

naho wana kinyemi want'hu wakumtenda Zumbe kunda Mnungu ywewe.