1 Mnungu unionele mbazi,

kwaviya wank'hondo wangu wanisulumiza,

wanigela makunt'ho lupisi lwose.

2 Msi mgima wahigani wangu wanikump'hukila, wabinda wingi awo wakunitowa nk'hondo.

3 Umwo hogoha,

miye nakuhuwila weye Zumbe Mnungu.

4 Namkawila Mnungu na kuitunya mbuli yakwe,

namhuwila yehe naho hikogoha.

Mnt'hu mta mwili naanitendei?

5 Msi wose wahitula milosi yangu,

mizungu yawe yose ni kuunga kunikoma.

6 Wadugana kwa kifiso,

wakapelemba lugendo lwangu

wakawiila kunikoma.

7 Haluse, walihe viligane no uwihi wawe,

uwakome awo kwa maya yako weye Mnungu.

8 Weye kuyamanya makunt'ho yangu,

kuika nk'humbukila zo kuila kwangu,

aya hayawandikwe mwe kitabu chako?

9 Kila hakwitanga,

wank'hondo wangu wavuzwa kunyuma,

iki nicho nimanyize kwaviya Mnungu kakimaila kwangu.

10 Mwa Mnungu uyo hutunya imbuli yakwe,

na mwa Zumbe uyo huutunya ulosi wakwe,

11 miye namhuwila yehe, henogohe,

mnt'hu mta mwili naanitendei?

12 We Mnungu, miye nenilave kiya nilagane,

nohulavile malavo ya nt'hogola,

13 kwaviya kuniyokola kulawa mwe file,

na kunamila nise kukobadika.

Naivo nagenda ho undiilo wa Mnungu,

mwo ung'azi wo ugima.