1 Ni weye wikedu Zumbe Mnungu ywa kutunywa,

suwe hakiwagilwe kwink'wa ukulu,

kwajili yo lukunde lwako no uhuwilwa wako houkusila.

2 Nii want'hu wa si wakiuze kugamba,

"Ekuhi Mnungu ywenyu?"

3 Mnungu ywetu ekwe mbingu,

adamanya yakumwelela.

4 Mna mahili yawe ni ya masawa na zahabu,

yatile kudamanywa ni want'hu.

5 Yana milomo mna hayakulonga,

yana meso mna hayakuona,

6 yana magutwi mna haya kwiva,

yana mp'hula mna haya kuhefya,

7 yana mikono mna hayakudaha kukwafa,

yana viga mna hayakudaha kugenda.

Malaka yawe hayakudaha kulava maizwi.

8 Wose wakuyadamanya wenye nawo ni enga ivo yeli,

naho nivo weli awo wakuyakawiila.

9 Nyuwe Izilaeli mkawiileni Zumbe Mnungu,

uyo niye mwambizi naho nk'hindo yenyu.

10 Nyuwe mp'huga ya Haluni mkawiileni Zumbe Mnungu,

uyo niye mwambizi naho nk'hindo yenyu.

11 Nyuwe mkumvika Zumbe Mnungu mkawiileni yehe,

uyo niye mwambizi na nk'hindo yenyu.

12 Zumbe Mnungu akikumbukila na kukivikila,

naawavikile want'hu wa Izilaeli

naaivikile imp'huga ya Haluni.

13 Naawavikile wose wakumwogoha Zumbe Mnungu,

wakanda wose wakulu na wadodo.

14 Zumbe Mnungu awagenyezeni

nyose hamwenga na welekwa wenyu.

15 Mvikiliwe ni Zumbe Mnungu,

uyo aumbile Mbingu na si.

16 Mbingu ni za Zumbe Mnungu,

mna si kawenk'ha want'hu.

17 Wabanike hawakudaha kumtunya Zumbe Mnungu,

na yeyose akuseela hasi kwe isi ya wabanike.

18 Mna suwe wagima nekimvike Zumbe Mnungu,

kukongela ivi haluse na mazuwa yose.

Zumbe atunywe!