1 We Mnungu, weye ywi Mnungu ywangu,

nakuzungulisa

miye naungisa kunda na weye,

moyo wangu ukaluka,

ukaluka enga mnt'hu mta nk'hilu. Nna nk'hilu enga isi ibabaluke.

2 Hihaona hakukile hako,

naho hiuona udahi wako no ung'azi wako utendese.

3 Kwaviya lukunde lwako helwiina uheelo ni wedi kujink'ha ugima,

na kwa ayo miye nohutunye.

4 Nohutogole mwo wikazi wangu wose,

naho kwa zina dyako neninule kulanga mikono yangu halombeza.

5 Name neninde higuta enga hidya nk'hande ya wila,

kwa mnomo wangu nenikeme nt'hunyo zako.

6 Umwo hagona mwo lusazi lwangu nohukumbukile,

na kukufanayanya mwe kilo icho,

7 kwaviya kunda mwambizi ywangu,

naho handa mwe mp'heho ya mawawa yako nenikeme kwa kinyemi.

8 Miye nanda kimbambati na weye,

udahi wako wanidima kwa vedi.

9 Wose wakuunga wanikome,

nawahubugile hasi kwe isi ya wabanike.

10 Nawakomwe kwa sime,

vimba vawe nevinde nk'hande ya mauzi.

11 Kwaviya Mnungu naamwink'he uhumi,

sueta naange.

Wose wakuika lagano mwe dizina dya Mnungu nawamtogole,

mna milomo ya wadant'hi neinyamazwe.