1 Zumbe ywangu, unitegeleze aya hulonga,

aho usinye ivo hufanyanya.

2 Wive ndilo yangu,

seuta ywangu na Mnungu ywangu,

kwaviya weye niwe hukulombeza.

3 Weye Zumbe Mnungu, mtotondo wive izwi dyangu,

mtondo hakulavila nt'hambiko yangu,

miye nagojela uhituzi wangu.

4 Kwaviya weye Mnungu hukuunga wiihi,

kwako mnt'hu mwihi hakudaha kwikala na weye.

5 Wata weduvi hwaekuungwa kukimala hako,

weye wawaihiya wose wakudamanya wavu.

6 Nouwabanange wose walulimi,

wawaihiya wakomi na wadant'hi.

7 Mna kwa uwedi wako,

miye neniingile mwe nyumba yako,

nohuvike mwe dihema dyako dikukile,

nenifunamize kihanga hasi kwa kukuvika.

8 Zumbe ywangu, unilongoze mwo uwedi wako,

kwaviya wank'hondo wangu wanigoja wanikump'hukile,

wiike vedi sila yako hangu.

9 Milosi yawe haina kindedi,

mwe miyoyo yawe mmema ubanangi,

milomo yawe ni enga kikuta kigubulwe

nyimi zawe zimema udant'hi.

10 Uwasengele mwe masa yawe Mnungu ywangu,

wagwe kwa kwa wiihi wawe wenye,

naho uwakulumbuze kwa wavu wawe ubindile wingi,

kwaviya wakuleka weye.

11 Mna nawande na kinyemi wose nawagulukile kwako,

wakeme kwa kuwanga mazuwa yose,

uwamile wahuwilwa wako wose,

vileke wakuonele kinyemi weye.

12 Kwaviya weye Zumbe Mnungu wawavikila want'hu wedi,

wawamila kwa lukunde lwako enga nk'hindilo.