1 Mnungu kamanyika mwe Yuda,

zina dyakwe dikulisa mwe Izilaeli.

2 Dihema dyakwe diiyuko Yelusalemu,

ukalo wakwe wi Sayuni.

3 Kudya kaipochola misale yandaga na moto,

zink'hindo zawe ne zisime, heiye, ne vitowanilo vawe vose vituhu.

4 Weye Mnungu una ung'azi utendese,

kutunyiswa kujink'ha milima imemile makala yakudigwa nyama,

umwo wawakup'hukilaga na kuwahuma wank'hondo wako.

5 Watowani wawe wahokigwa vose wandile navo,

naho haluse wagona nt'hongo za file,

ludole lwawe no umanyi wawe hauwambize kint'hu.

6 Wize uwafank'hile weye Mnungu ywa Yakobo,

zifalasi hamwenga na awo wakuzigendeza, wagwaga hasi na kubanika.

7 Weye wikedu niwe ukwogohwa,

niani akudaha kukimaala ho undiilo wako,

mwo lupisi lwa maya yako.

8 Kutambula usengelo wako kulawa kwe mbingu,

isi niyo yogohesa na kwikala kinyamaile,

9 aho weye Mnungu wize winuke vileke usengele,

uwayokole wose wahujilwe mwe isi.

10 Ikindedi maya yako yatendese kwa want'hu yakutunya weye,

wasigale na kuhona mwa maya yako nawayokolwe.

11 Mwink'heni Zumbe Mnungu kiya mumlagane,

si zose zimzunguluke mwink'heni mageleko,

uyo ywo kwogohwa.

12 Yehe awakoma want'hu wakulu,

na kuwatisa maseuta we si.