1 Zumbe Mnungu kunipelemba naho kunimanyisa,

2 weye kumanya ukwikala kwangu na kugenda kwangu,

kuzimanya zifanyanyi zangu kukongela hale.

3 Weye kulumanya lugendo lwangu hegu kuhumula kwangu,

kuzimanya zisila zangu zose.

4 Umo handa hinati kulonga,

weye kukombaganya kale icho huunga nilonge.

5 Weye kunizunguluka nt'hendelo zose,

wanamila kwa kunigeleka mkono wako.

6 Umanyi wako nawehelwa,

ukulisa, miye hikudaha kuukombaganya.

7 Nenigulukilehi hakunyilika,

uko hudaha kukefisa no undiilo wako?

8 Uneva nna ita kwe mbingu uko wiyuko,

hagamba nigulukile kwe isi ya wabanike weye wiyuko.

9 Nna puulukila hale ulailo wa zuwa,

na kwikala nt'hendelo za hale za uheelo wa bahali,

10 uko nako wiyuko udahi wako wanilongoza,

mkono wako wa kulume wanitozeleza.

11 Hata uneva nnadigamba diziza dinigubike,

dinizunguluke hant'hu ha ung'azi,

12 uumwo mwe diziza weye wading'aza,

naho nekilo kwako kwang'ala enga nomsi,

kwako weye kilo na nomsi vose ni viligana.

13 Ni weye udamanye vilungo vangu,

naho wanilunganyaga mwe mbeleko ya mnala.

14 Nakutunya weye kwaviya kuniumba

kwa udamanyi wako wa kwehela na kwa kutisa,

ayo hiyamanyisa kwa vedi.

15 Weye wanionaga,

umwo haumbwa kwa kinyele,

aho naumbwagwa kwa umanyi

niyo naikwaa mwe mbeleko ya mnala.

16 Weye wanionaga

hata umwo nandaga hinati kwelekwa,

mazuwa yangu ayo wanipangilaga

yawandikwagwa mwe kitabu chako umwo yandaga hayanati yalaile hata zuwa dimwenga.

17 Weye Mnungu, fanyanyi zako zikulisa,

hazikadahika kuwazigwa.

18 Uneva nayawazile hegu nayakanda mengi kujink'ha msanga.

naho henuka nikei hamwenga na weye.

19 Weye Mnungu, hegu nevinda vedi wawakomile want'hu waihile,

nivedi wakomi wahalawe hangu.

20 Walonga yaihile mwa weye,

wasimuila maihi mwe dizina dyako.

21 We Zumbe, togola niwaihie wakukuihiya?

niwabele wadya wakusaguka kwako?

22 Nawaihia vitendese wakukusaguka,

wank'hondo wako ni wank'hondo wangu.

23 Unipelembe weye Mnungu uumanye umoyo wangu,

unihime uzimanye zifanyanyi zangu.

24 Unikaule uone uneva mwangu yeyuko yakuihiza,

unilongoze mwe zisila za mazuwa yose.