1 Unitegeleze weye Mnungu niyo wanihitula

kwaviya miye ni mkiwa hiina wambizi.

2 Uuhonye ugima wangu miye kwaviya nakukawiila weye,

niyokole miye mndima ywako hukawiila kwako.

3 Ni weye Mnungu ywangu, nionele mbazi,

miye nakwiila weye msi wose.

4 Nink'he kinyemi weye Zumbe ywangu,

kwaviya makawiilo yangu ye kwako.

5 Weye Zumbe u ywedi naho wawausila want'hu masa yawe,

kumema lukunde kwa wose wakukulombeza.

6 Unitegeleze kulombeza kwangu, weye Zumbe Mnungu,

unitegeleze miye huiila wambizi.

7 Makunt'ho yakaniziila nakwitanga,

kwa viya weye wanitika.

8 Hakuli mnungu mtuhu enga weye Zumbe Mnungu,

naho hahali adamanye enga ayo ukudamanya.

9 Want'hu wose wa isi zose uwaumbile,

naweze kwako na kwinamiza vihanga vawe hasi ya aho wili,

nawabwelekeze ukulu we dizina dyako.

10 Kwaviya weye ywi mkulu naho wadamanya va kweheela,

weye wikedu niwe Mnungu.

11 Zumbe ywangu, nihinize kudamanya viya ukuunga,

name neniyatimile kwa uhuwilwa,

12 Nohutogole kwa moyo wangu wose weye Zumbe, Mnungu ywangu.

neniutunye ukulu we dizina dyako mazuwa yose.

13 Lukunde lwako kwangu lukulisa,

Kuniyokola miye kulawa kwe isi ya wabanike.

14 Mnungu, want'hu wakukeduvya wanikump'hukila,

fyo dya makwank'hwalu waunga wanikome,

ni want'hu hewe kukogoha weye.

15 Mna weye Zumbe Mnungu ni mta mbazi naho uywedi.

weye hukukump'huka mwa maya,

weye kumema lukunde na uhuwilwa.

16 Nihitukile unionele mbazi, nigele ludole naho uniyokole,

kwaviya miye ni mndima ywako enga ivo andaga mnala.

17 Weye Zumbe Mnungu, nilagise ivo wili uwedi wako kwangu,

wose hewekuniunga nawengile soni,

aho wakaona kugamba kunambiza na kunihumuza.