1 Hinyamala, namgoja Mnungu ekedu,

uyokozi wangu walawa kwakwe.

2 Ikindedi yehe niye unyilikilo wangu na uyokozi wangu,

yehe ni gomela dyangu,

henisingisike.

3 Ivi nyuwe nyose nomgendeele kumtowa mnt'hu, vileke mumkome nyuwe nyose kwa hamwenga?

enga lukazi lwiname, naho enga lukandula lukuunga lumoke?

4 Mwaunga du kumkinya mnt'hu kulawa mwe nt'hunyo yakwe,

mwaona ni kint'hu chedi kwenyu kudant'ha,

mwavikila kwa milomo du,

mna mwe miyoyo yenyu mwaligita.

5 Miye ninyamale nimgoje Mnungu du,

kwaviya miye namkawiila yehe ekedu.

6 Yehe ekedu niye nk'hindo yangu na uyokozi wangu,

niye gomela dyangu miye henisingisike.

7 Uyokozi na nt'hunyo yangu valawa kwa Mnungu,

yehe nk'hindo yangu itogile,

ni unyilikilo wangu.

8 Nyuwe want'hu mhuileni yehe mazua yose,

mhuwi we mioyo yenyu yehe aumanye,

kwaviya yehe niye unyilikilo wetu.

9 Want'hu wose ni enga muye du,

wakulu wose wadant'hi,

wanagelwa mwe kihimo hawana kint'hu.

10 Use kuhuwila kuhujila

na kukawiila vint'hu va ubavi

hamwenga na kugamba ugoli wagenyela, use kukawila umwo.

11 Mnungu kalonga lumwenga du,

miye hiva mbuli mbili,

kugamba udahi ni wakwe Mnungu,

12 kwaiya weye Zumbe Mnungu, ni mta lukunde,

kwa kindedi noumlihe kila mnt'hu viligane na ivo adamanye.