1 Zumbe amgamba zumbe ywangu,

"Ikala kulume kwangu,

mpaka niwaike wank'hondo wako hasi ye viga vako."

2 Zumbe Mnungu kagamba naaugendeze useuta wako kulawa Sayuni,

naho agamba, "Unde seuta mgati mwa wank'hondo wako."

3 Umwo ukaita kwe nk'hondo,

want'hu wako nawakwiziile kwa kuunga wenye,

nounde kuvaligwa valo dikukile

naho ludole lwako nalutendwe luhya

kila zuwa enga mnyuzu wa mtondo.

4 Zumbe Mnungu kakuikila kilapi naho haakihitule,

"Nounde mlavant'hambiko ywa mazuwa yose enga ivo andaga Melekizedeki.

5 Zumbe e kulume kwako,

naawahonde maseuta aho akeza kunda na maya.

6 Naasengele want'hu mwe si,

na kukoma want'hu wabindile wingi,

naawatowe maseuta mwe si yose.

7 Seuta naanywe mazi ya kazuto mwe sila,

na kugelwa ludole, naande mhumi."