1 Mtogoleni Zumbe Mnungu kwo uwedi wakwe,

kwaviya lukunde lwakwe ni lwa mazuwa yose.

2 Izilaeli naalonge,

kugamba, "Lukunde lwakwe ni lwa mazuwa yose."

3 Welekwa wa Haluni walonge elo,

kugamba, "Lukunde lwakwe ni lwa mazuwa yose."

4 Wose wakumvika walonge,

"Lukunde lwakwe ni lwa mazuwa yose."

5 Mwa makunt'ho yangu namlombezaga Zumbe Mnungu,

anink'haga uhituzi na kunitenda mlekelwa.

6 Zumbe ehamwenga na miye henogohe,

mnt'hu naanitende vivihi?

7 Zumbe ehamwenga na miye, naho niye akunambiza,

neniwaone wank'hondo wangu wakahumwa.

8 Ni vedi kunyilikila kwa Zumbe,

kujink'ha kumkawiila mnt'hu.

9 Ni vedi kunyilikila kwa Zumbe,

kujink'ha kukawiila vilongozi wa want'hu.

10 Want'hu wa si zose wanizungulukaga,

mna kwa zina dya Zumbe nawakomaga wose.

11 Wanizungulukaga nt'hendelo zose,

mna kwa zina dya Zumbe, nawakomaga wose.

12 Wanizungulukaga enga tuluma dya nyuki,

mna wasunguzaga kuhya enga kasaka ka miwa,

nawakomaga kwa zina dya Zumbe.

13 Wazungulaga kila mzungu wanikome,

mna Zumbe anambizaga.

14 Zumbe anitendaga mdahi na mta ludole,

yehe kanda niye uyokozi wangu.

15 Mila na kinyemi cha uhumi vakemwa mwe nk'hambi ya want'hu wa Mnungu.

Udahi mkulu wa Zumbe udamanya aya.

16 Udahi mkulu wa Zumbe utunywa,

Udahi mkululu wa Zumbe wadamanya makulu.

17 Miye henibanike, neninde mgima,

name nenisimuile makulu adamanye Zumbe.

18 Zumbe kanisulumizisa,

mna hanilekile nibanike,

19 Nikomoele ink'hili ya wawagilwa,

neningile na kumtogola Zumbe.

20 Ino ni nk'hili ya Zumbe

wawagilwa numwo wakwingiila.

21 Nakutogola Zumbe kwaviya kuniva,

naho kunink'ha uhumi.

22 Iwe wadilemelaga wazesi

dinda iwe hediikuungwa kusweswa.

23 Mbuli ino ilawa kwa Zumbe,

nayo ni ya kweheela kwetu.

24 Idi nidyo dizuwa didamanywe ni Zumbe.

Kinde na kinyemi na kwanga.

25 Kiyokole weye Zumbe,

ukivikile weye Zumbe Mnungu kikanda mwe nyumba yako.

26 Kavikilwa akwiza kwa zina dya Zumbe,

chawavikila kulawa kwe nyumba ya Zumbe.

27 Zumbe niye Mnungu,kanda ywedi kwetu,

kongeni wila mkanda na mahuto mwe mikono,

niyo mwagenda kuzunguluka hant'hu ha kulavila nt'hambiko.

28 Ni weye Mnungu ywangu, nohutogole,

weye Mnungu nohutunye.

29 Mtogoleni Zumbe Mnungu kwaviya ni ywedi,

lukunde lwakwe ni lwa mazuwa yose.