1 Nyuwe wakulu we isi mwalamula mwo uwagilwa?

Nyuwe mwasengela want'hu haheina kwazagula?

2 Bule! Mwafanyanya du ivo mkudaha kudamanya yaihile,

naho mikono yenyu ni ya kuhujila du mwe isi.

3 Waihi wasaguka kukongela mwo kwelekwa kwawe,

kukongela aho wenuilwagwa ubovu woho waganika wakadant'ha du.

4 Wana usungu enga usungu wa nyoka,

woho ni enga nyoka heikuunga kutegeleza,

5 uyo heekutegeleza izwi dya wasai,

hata uneva ana umanyi mwo uganga wakwe.

6 Weye Mnungu, uyang'ole ameno yawe, ng'ola zingeso ze zisimba izo.

7 Wage enga mazi yakunyweela mwe sanga,

wakalasa misale yawe inde mafifigu.

8 Woho wande enga kove dikulungulumka umwo dikagenda,

naho wande enga katiti kabanike kakanda kakei kuona ung'azi.

9 Aho nyungu zenyu zikand zikei kukola moto wa nk'huni za miwa,

zikanda nt'heke hegu zinyaile,

waihi nawande wapuputisilwa hale.

10 Wawagilwa nawande na kinyemi wakaona waihi wakalihizwa,

umwo viga vawe vikajata sakame ya waihi.

11 Naho want'hu nawagambe, "Ikindedi wawagilwa wana mageleko yawe,

ikindedi, eyuko Mnungu akusengela si yose."