1 Moyo wangu umema fanyanyi zedi,

himtuwila wila seuta,

lulimi lwangu ni enga kalamu ya mwandishi ywedi.

2 Weye ywi mbwanga kujink'ha want'hu wose,

mbuli zako ni zedi du,

kwaviya Mnungu kakuvikila mazuwa yose.

3 Kekake sime yako mtowani!

weye ni mkulu naho mta nt'hunyo.

4 Ukulu wako ugenyele upate uhumi,

mwo kwikaila falasi ugombele ikindedi, kukeseleza na kwamila uwagilwa,

mkono wako wa kulume ulagise udamanyi mkulu wa kweheela.

5 Misale yako yatwelesa,

yawalasa wank'hondo wako,

want'hu wa si zose yagwa ahako.

6 Weye Mnungu difumbi dyako dyo ukulu ditoga,

nedikale mazuwa yose,

weye wawalongoza want'hu wako kwa uwagilwa.

7 Waungisa uwedi naho wauihiya uwavu,

kwaivo Mnungu ywako kakusagula,

na kukuink'ha kinyemi kujink'ha weyawo.

8 Mavalo yako yana mhemp'he wedi,

wakemi wakubwedeza mwe nyumba, ihambigwe na mp'hembe ze nt'hembo.

9 Wanakike wa maseuta ni wamwenga mwa wavele wa nt'hunyo,

naho kulume kwako kakimala mwali ywe ndoza,

kavala mahambo ya zahabu yedi kulawa Ofili.

10 Tegeleza weye mwana kike,

ika gutwi dyako wivilise,

haluse jala want'hu mwe isi yako na wanduguzo.

11 Undele wako wamtenda seuta akumunk'hile,

yehe ni zumbe ywako,

vaungwa umwive.

12 Wanakike wa Tilo nawakwigaile geleko,

wagoli nawaunge kukehembeleza kwako.

13 Mwana kike ywa seuta ana kinyemi vitendese,

valo dyakwe disumigwa kwa uzi una langi ya zahabu,

14 akanda kavala valo dya langi nyingi,

akalongozwa kwa seuta,

asindikizwa ni wambizi wakwe, wali na mazanga weyawe,

woho nawo wegalwa kwako seuta,

15 kwa kinyemi na kwanga wabula uko,

na kwingila mwe dizumba dye kiseuta.

16 Seuta noupate wana wabindile wingi,

nawalongoze hant'hu ha wakale wawe enga maseuta,

nouwatende wekaile si yose.

17 Neniditende zina dyako dikumbukilwe mwe vyeleko vose,

na ivo want'hu wose nawo nawakutunye mazuwa yose.