1 Namuunga Zumbe kwaviya kaniva

izwi dyangu na kulombeza kwangu.

2 Yehe kanikingila digutwi dyakwe

ivo nenimwitange wikazi wangu wose.

3 Sigi zikukoma zanizinganizaga,

naonaga usungu mkulu wa kwe isi ya wabanike.

nehizamilwa ni makunt'ho na kinyulu.

4 Aho niho namwitangaga Zumbe hamgamba,

"Weye Zumbe nakulombeza, yokola ugima wangu!"

5 Zumbe ni ywedi naho muwagilwa,

Mnungu ywetu kamema mbazi.

6 Zumbe Mnungu awamila heweina ludole,

anihonyaga umwo nandaga mwo kwangamila.

7 Weye moyo wangu, uya hant'hu hako ho kuhumula,

kwaviya Zumbe Mnungu kanda ywedi kwangu.

8 Zumbe Mnungu aniyokolaga mwo kubanika,

ainyamazaga indilo yangu,

no kunamila nesekukobadika iviga vangu.

9 Haluse nagendela mwo undiilo wa Zumbe Mnungu,

mwe isi ya wagima.

10 Nakuhuwilaga niyo nagamba,

miye hisulumiziswa,

11 hata umwo nandaga mwo kwangadika nagambaga,

"Want'hu wose hawana ukindedi."

12 Nimwink'hei Zumbe Mnungu,

kwo uwedi wose anidamanyile?

13 Nenimlavile Zumbe Mnungu kiyamp'ha cha mazi ya zabibu

na kumtogola kwa kuniyokola.

14 Nenikint'hize yadya nilongile kwa Zumbe Mnungu,

ha want'hu wakwe wose.

15 Kubanika kwa muwagilwa,

kuna nt'hunyo kwa Zumbe Mnungu.

16 Zumbe Mnungu, ikindedi miye ni mndima ywako,

nadamanya zindima zako enga ivo atendaga mnala,

kuniyokola kulawa mwe file.

17 Nohulavile nt'hambiko yangu ya nt'hogola,

no kulombeza kwa zina dyako.

18 Nenikint'hize kiya nimlagane Zumbe Mnungu,

mwo mdugano wa want'hu wako wose,

ho undiilo wa want'hu wakwe wose,

19 mwo lwazo lwe nyumba ya Zumbe Mnungu,

mgati mwako weye Yelusalemu.

Zumbe atunywe.